Minister Dangui Oduber Cifranan di Turismo pa luna di july 2019 ta fuerte y solido

Turismo di Aruba ta pasando den su mihor momentonan den historia di nos pais.
Minister Dangui Oduber ta sumamamente contento y satisfecho cu e resultadonan di aña 2018 y sigur tambe pa loke ta trata e prome shete lunanan di aña 2019. Tur e indicadornan ricibi door di AHATA ta positivo y ta confirma cu e maneho di Minister Dangui Oduber ta dunando resultado. Manera ta conoci e maneho di Minister Oduber ta dirgi riba turistanan di calidad y turistanan cu tin un spending capacity hopi halto.
Den luna di juli e grado di occupacion a subi cu 3 porciento compara cu juli 2018 y cu esaki un di e grado di occupacionnan mas halto den henter Caribe cu 88.7%. Aruba ya no conoce low season mas mirando e indicadornan, segun e mandatario.
Banda di e grado di occupacion e REV PAR den luna di juli a conoce un crecemento di 8.2% den compracion cu luna di juli 2018. E REV PAR den juli 2019 tabata $219.51.

E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais. E maneho di Minister Oduber a wordo demostra cu e ta dunando resultado, treciendo e turistanan cu ta laga mas placa den nos economia. Otro indicador hopi importante ta e ADR (average daily rate) cu tambe a conoce un aumento di 4.6%. E average daily rate den luna di juli 2019 ta $247.39. Turismo ta keda e driver principal di nos economia, resultadonan di luna di juli ta confirma cu Aruba su Turismo ta sigui crece y sigui desaroya cu bishitantenan nobo. Maneho di minister Dangui Oduber ta dunando e resultado conforme e vision di atrae turistanan di calidad y esaki a wordo confirma cu cifranan di AHATA. Esaki sigur ta un noticia hopi positivo, finalmente e mandatario a gradici tur empleadonan y tur partners den sector turistico pa cu e resultado bunita aki.

Comments

comments