Durante un conferencia di prensa awe na Aruba Ports Authority, Minister Dangui Oduber conhuntamente cu CEO di APA sr Marc Figaroa a anuncia cu dia 13 di juli 2021 Aruba lo ricibi e barco crucero Carnival Horizon cu 2800 pasahero abordo.
Esaki sigur ta un tremendo noticiapa Aruba su Turismo y economia cu ta den pleno recuperacion. Teniendo na cuenta cu e pandemia ainda ta presente no solamente na Aruba pero mundialmente, Ministerio di Turismo a bin ta haci esfuerso for di comienso di aña pa negosha cu lineanan crucero pa yega na un acuerdo pa loke ta trata protocolnan di COVID-19 p’asina garantisa siguridad pa localnan. Den pleno pandemia pro activamente minister Oduber y Sr Figaroa a bishita lineananan crucero den luna di februari 2021 pa cuminsa papia y delibera riba reactivacion di barconan crucero pa Aruba.
Awe por mira e resultadonan di esaki considerando e hecho cu Aruba ta un di e prome destinacionnan den henter Caribe pa ricibi barconan crucero.
“Nos ta sumamente contento cu nos por a logra convence e dos lineanan crucero cu ta Royal Caribbean y Carnival Cruiselines pa bin Aruba. Dia 9 di juni ultimo Aruba a ricibi Celebrity Cruiselines, cu a scoge Aruba como su prome destinacion desde aña pasa cu Aruba a bay den lockdown y asina mundialmente a bin un paro na Turismo Crucero. Riba 13 di juli Aruba lo ta ricibi Carnival Horizon cu 2800 pasahero. Ta premira cu pa aña 2021 Aruba lo ta ricibiendo 69 barco crucero. Esakinan sigur ta cifranan positivo pa Aruba cu ta den un aña di pandemia. Cu recuperacion di nos Turismo Crucero, APA N.V. lo tin un futuro briyante su dilanti y asina lo por continua cu desaroyo y upgrade di Terminal Crucero,” Minister di Turismo a bisa.
Den cuadro di e protocolnan relaciona cu Covid-19, un ekipo cu ta consisti di APA, ATA, DVG y Directie Scheepvaart cu pa lunanan a traha basta duro pa finalisa tur e protocolnan pa asina ambos partido, esta pais Aruba y lineanan crucero por a bay di acuerdo cu ne.
Un nota importante ta e hecho cu 95% di esnan abordo ta vacuna. Tin un porcentahe chikito cu no por ta vacuna, manera entre otro muchanan. Na banda di esaki Carnival Cruiselines mes tin un cantidad limita cu e ta permiti abordo di e crucero. Aruba ta y keda un destinacion preferencial di Carnival Cruiselines.
Gobierno di Aruba ta sumamente contento y agradecido cu esfuersonan haci pa APA N.V. DVG y Ministerio di Turismo p’asina logra yega un acuerdo di protocol pa asina Aruba su Turismo y Economia por sigui recupera. Minister Oduber ta sigui traha y demostra e compromiso pa trece turistanan Aruba pa keda contribui na nos crecemento economico.