Minister encarga cu Turismo, Salud Publico y Deporte, Sr. Dangui Oduber a reuni cu director financiero di Dr. Horacio Oduber Hospital Sr. Theo de Kool.
E prome reunion entre e Minister encarga cu Salud Publico y e director financiero di Hospital a bai den un esfera ameno y positivo, caminda cu a papia riba diferente puntonan di interes pa cu Hospital. E reunion mester a tuma luga tambe hunto cu e director medico Sr. Ezzard Cilie pero lamentablemente e ta cu vakantie den exterior.
E director financiero di hospital a vocifera cu berdad Hospital tin su retonan y lo kier enfrenta esakinan den un forma profesional y tambe den cooperacion cu e Minister. Sr. de Kool kier yuda tambe reduci e lista di espera pa cu citanan cu specialista y tambe e tempo di espera na departamento di Emergencia. E tempo di espera actual ta 2 ora for di ora e pashent wordo registra te ora e wordo atendi. Actualmente e tempo di espera den Caribe ta 2 ora y 20 minuut. Den e renobacion actual di hospital a amplia e cantidad di cambernan den e departamento di Emergencia cu na su turno lo yuda reduci e tempo di espera. Tambe e director financiero a menciona cu tin un escasez di “gespecialiseerde verpleegkundigen” actualmente y e buraconan ey bo no ta cera nan facil pero lo haci lo maximo esfuerso pa por aumenta e cantidad di e grupo specialisa aki.
E minister a comparti su vision pa cu Hospital y Salud Publico en general cu e director financiero. E mandatario a subraya cu e kier mehora e cuido en general y e calidad di cuido. Sr. Theo de Kool a bisa di ta trahando bon cu AZV y cu IMSAN, pero cu IMSAN e ta kere cu por tin miho entendimento entre e dos instancianan aki. Tambe Sr. de Kool a trece algun sugerencianan padilanti entre otro, e gasto di cuido medico pa turistanan cu ta entre 700.000 cu 1 miyon florin pa aña y mester yega na suficiente fondo pa cubri esaki.
E otro problema ta encera e trayecto pa haya certificacion pa cu e opleiding di verpleegkunde duna na Aruba. Actualmente esaki no ta wordo reconoci manera na Boneiro cu ta un gemeenschap di Hulanda. E Minister a compromete su mes pa purba yega na un solucion pa cu e problematica aki pa pidi parlamento pone esaki den nan agenda di reunionnan cu IPKO pa reconoce esunnan den Reino mescos cu na Hulanda of Boneiro cu ta un gemeenschap di Hulanda. E problematica aki sigur lo wordo discuti cu e miembronan di parlamento pa asina e cursonan aki wordo reconoci den futuro.
Minister Dangui Oduber a corto plaso lo instala un comision oficial cu lo bay atende cu e problematicanan den hospital entre otro servicio, cuido y calidad. Y tambe sin laga afo e lista di espera pa cu citanan cu specialista y tempo di espera den e departamento di Emergencia.