E siman aki e Minister encarga cu Turismo, Salubridad Publico y Deporte, Sr. Dangui Oduber a continua cu su ronda di consulta cu esunnan den e tereno di Salubridad Publico. Minister Dangui Oduber a tene su prome reunion cu director di Directie Volksgezondheid, Sr. Jerry Staring.
E reunion a bai den un esfera positivo, caminda cu e Minister a comparti e vision di e gobierno nobo y tambe e vision di e Ministerio di Turismo, Salubridad Publico y Deporte.
E Minister a splica en corto su maneho na e director di Directie Volksgezondheid, cu ta dirigi riba prevencion y consecuentemente mester bin cu campañanan di conscientisacion pa di e manera aki conscientisa e pueblo riba e importancia di biba saludabel y pa preveni mas tanto cu ta posibel.
Lo introduci un test di salud obligatorio pa tur hende na Aruba cu ta registra na censo, pa asina por haya un “nulmeting” di cada cuidadano riba nos pais. Di e manera aki lo traha un file pa cada cuidadano y tambe asina crea statisticanan encuanto e situacion di salud general pa asina traha un maneho specifico riba e malesanan of enfermedadnan cu mas ta sobresali den nos poblacion. Esaki ta importante pa asina cuminsa enfoca riba prevencion y pa di e forma aki hiba un maneho preventivo cu lo duna su frutonan na bienestar general di nos comunidad.