Durante weekend cu a pasa, a sosode un incidente desagradabel na Baby Beach caminda a tuma luga un discusion entre turistanan y activistanan local tocante uso di palapa y beach. E activistanan, cu ta preocupa pa e presion di eventualmente locual “overtourism” por yega di significa pa nos isla, tawata expresa nan malcontento y dicidi di ataca diferente turistanan.
Minister di Turismo, sr. Dangui Oduber, ta informa cu e ta consciente di e situacion y kier dirigi su mensahe tanto na localnan, activistanan, pero sin lubida na e bishitantenan di nos dushi isla.
“Nos ta compronde cu e popularidad creciente di Aruba como un destinacion turistico ta trece retonan, particularmente na aspectonan di maneho di e balansa entre turismo y preservacion di nos cultura y medioambiente local,” Minister Dangui Oduber a bisa. “Sinembargo, ta importante pa recorda cu turismo ta e unico pilar di nos economia, cu ta duna pan pa miles di residente di nos isla. Nos no mester morde e man cu ta duna nos di come.”
Minister Oduber ta enfatisa cu ta necesario pa tin dialogonan constructivo y ta urgi pa activistanan y tur localnan cu ta preocupa pa expresa na maneranan apropia. “Nos di ministerio di turismo, hunto cu tur partner den turismo ta comprometi pa traha huntu pa haya un balansa cu ta respeta tanto nos localnan como e bishitantenan cu ta contribui significantemente na nos economia. Nos ta keda proteha nos localnan na promer lugar y hustamente pesey a tuma varios accion concreto caba. Nos no a laga esakinan na palabra of plan, sino decisionan a wordo tuma caba.”
Un ehempel di decisionnan tuma ta cu a introduci un maneho nobo di permiso di hotel pa asina limita, reduci y/of para expansionan di hotelnan pa e siguiente añanan nos dilanti. Tambe a introduci un ley nobo pa regula vacation rentals na Aruba. Paso ya caba tin cifranan cu ta mustra cu 30% di tur bishitantenan cu ta yega Aruba ta kedando na un propiedad asina. Locual esaki ta causando ta cu viviendanan ta birando impagabel pa nos mes yiunan di tera. Tambe Minister Dangui Oduber a presenta un maneho di proyectonan di embeyecimiento yama “built with nature” pa asina respeta y conserva Aruba su naturaleza y crea e balansa necesario entre desaroyo y naturaleza.
Ministerio di Turismo y tur partner den turismo ta dedica pa asegura cu Aruba keda un destinacion di calidad, mientras cu ta tuma na consideracion e preocupasionnan bou nos localnan. “Nos localnan ta keda na promer lugar y ta importante pa nos adresa tur preocupacionan cu por tin.” Minister Oduber ta sigui bisa.
Minister Oduber ta invita tur partido pa crea practicanan di turismo sostenibel cu ta beneficia tur hende.
Pa finaliza, Minister Dangui Oduber a lamenta masha cu e tipo di accionanan cu a tuma lugar cu ta “target” e turistanan. E issuenan aki mester por wordo adresa na un otro manera sin cu mester ataca, insulta y core cu turistanan for di Aruba. Nos ta un isla cordial y cada bishitante tin masha hopi opcion awendia pero ta scohe Aruba pa bin pasa nan vacacion.
- Latest
