Minister encarga cu Turismo, Salubridad Publico y Deporte a celebra hunto cu nos grandinan durante e celebracion anual di Pasco di Club Kibrahacha 60+ den ballroom di Hilton Regency Hotel. E Minister tawata honra cu e invitacion y cu hopi entusiasmo a pasa un rato ameno y alegre hunto cu nos grandinan.
Durante e evento e mandatario di Salubridad Publico a enfatisa cu nos grandinan merece un cuido di calidad y cu nos grandinan merece e atencion necesario den e etapa di nan bida actual.
Minister Dangui Oduber a elogia e bon trabou cu Club Kibrahacha 60+ ta haci pa su miembronan y a gradici tur e boluntarionan pa nan dedicacion na nos grandinan. Meta di e fundacion ta pa lanta y mantene un centro di actividad pa nos grandinan. Un total di 300 persona tawata presente na e celebracion di Pasco pa nos grandinan di Club Kibrahacha.
Nos grandinan tawata masha contento mes cu presencia di Minister Dangui Oduber y tambe nan tawata masha entusiasma cu e Minister y a papia cu Minister riba diferente temanan agradabel y te hasta algun di nan a tene un baile cu e mandatario.
E mandatario encarga cu cuido di nos grandinan ta compromete su mes cu nos grandinan cu sigur den dje nan tin un aliado cu lo sostene y percura pa nan tin e cuido cu nan merece den e etapa actual di nan bida. E Minister lo percura cu suficiente fondo wordo aloca pa e fundacionnan cu tin e tarea di cuida y tene nos grandinan activo.
Minister Dangui Oduber tin un afecto unico pa cu nos grandinan y sigur e lo bay percura pa tin mas centronan den futuro na unda cu nos grandinan por hanja cuido y un bon “opvang”. Actualmente na Aruba nos no tin suficiente centronan pa nos grandinan tin un luga digno pa wordo cuida manera debe ser. “Vergrijzing” na Aruba ta aumentando aña pa aña y ta p’esey mester percura pa den futuro tin suficiente centronan bon ekipa y cu personalnan diploma pa atende cu nos grandinan.