Durante e tratamento di e ley di Citgo, parlamentarionan a haci diferente pregunta referente nos hoben y yiunan di tera cu ta subiendo e mercado laboral den diferente sector. Mirando e desaroyo importante cu Citgo lo trece cune pa e mercado laboral, Gobierno di Aruba a inclui den e discusionnan aki, un programa di certificacion pa hobennan cu ta terminando diferente estudio. E programa aki, ta uno cu Minister Croes a traha riba dje pensando specificamente riba nos hobennan cu mañan lo mester ta esunnan cu ta carga e trabounan den un refineria. Banda di esaki a inclui un programa di certificacion pa e sector energetico tambe pa asina amplia e posibilidadnan pa mas hoben haya un empleo den e refineria. Minister Croes a duna di conoce cu a tuma nota cu tin varios hoben cu tin e habilidad tecnico, e capacidad y sa con pa traha den e ramo pa cual rason Minister Croes a pone enfoke pa no tin ningun clase di barera pa stroba nos hobennan haya un trabou den e refineria. Pa haci esaki posibel, Minister Paul Croes a pone enfasis riba pa inclui un programa den e certificacion program aki cu ta pone atencion tambe riba e aspecto social. Minister Croes ta kere firmemente cu mester kita e bareranan social cu tin pa un hoben por drenta e Mercado laboral pa asina un y tur tin e oportunidad husto pa haya un trabou den e refineria, cu un bon salario y un stabilidad financiero y tambe un posibilidad pa por crece tambe eventualmente den e refineria. Pa finalisa e minister en cuestion a duna di conoce cu hopi trahado Arubiano a cuminsa cu un edad hoben den e refineria, y e programa di certificacion aki ta pa garantisa cu cada hoben cu ta terminando nan estudio awor, tambe por traha den e refineria.