Diahuebs ultimo, riba cumpleaños di Minister President Mike Eman, Minister Paul Croes a compaña e mandatario pa asina cende luznan LED den e bario di Bakval. Minister Croes, como habitante di e bario ta sumamente contento cu e luznan aki den bario pa asina por brinda mas siguridad den e area di Bakval. Minister Croes a duna hopi elogio na Prome Minister pa e proyectonan aki mirando cu ta poco biaha bo ta haya un prome minister cu ta drenta bario, scucha e habitantenan y resolve e problemanan, y aki na Aruba nos por conta cu esaki. Proyectonan den bario ta un di e enfokenan principal di Gobierno pa asina eleva calidad di bida di tur habitante. Den diferente bario rond di nos isla ya caba a cuminsa drecha infrastructura, pone luznan den bario y hasta pone verkeersplateau pa asina yuda na controla e trafico. Na momento cu e bario ta ilumina y ta controla trafico insigur e ta trece e sentimento di siguridad pa e bario. Banda di esaki, Un bon infrastructura ta hiba na habitantenan mas contento y cu por bini hunto un biaha mas pa recrea. Ya caba varios bario por a mira cambio, pero aunke cu ainda falta, poco poco ta sigui p’adilanti cu e proyectonan pa asina sigui construi un pais solido. Durante e cendemento di luz den Bario di Bakval, e Bario completo a bin hunto den bon ambiente y duna nan muestra di aprecio pa e bon trabou.