Minister Croes a habri diaranson mainta cu un bishita special na Cruz Cora. E bishita aki tabata pa mira e desaroyonan di Cruz Cora despues di a participa na Feria Social. E aña aki, Cruz Cora a conta cu 5 hobennan boluntario di e comunidad Filepino cu a yuda Cruz Cora den duna curso na muchanan riba prome auxilio. E curso aki ta uno cu a keda duna na mas di 700 mucha pa asina yuda concientisa y educa e muchanan den diferente caso di prome auxilio. Feria Social a resulta den un exito total mirando e bon respaldo cu Rode Kruis a ricibi.Pa cu esaki Minister Croes ta gradeci Cede Aruba y sr. Daniel Tecklenborg pa e bon coordinacion di Feria Social. Rode Kruis ta un instancia sumamente importante pa nos comunidad mirando e aporte cu nan ta duna Aruba den momentonan di calamidad pero tambe e sosten cu nan ta brinda esnan di menos recurso. Rode kruis ta un instancia cu pa hopi aña ta existi y cu a sa di crece durante añanan birando un organisacion grandi tanto den servicionan cu e ta duna pero tambe e organisacion mes. Minister Croes ta elogia e trabou di Rode Kruis y ta pidi comunidad henter pa sigui apoya e organisacion aki cu ta esencial den prome ayudo pa nos pais. Pa finalisa Minister Croes a duna di conoce cu lo traha den futuro pa por tin un comunicacion mas estrecho entre tur fundacion y instancia cu ta trata cu e tema aki pa asina por brinda un miho servicio na nos comunidad.