Ministerio Hulandes di Enseñansa, Cultura y Ciencia, Jet Bussemaker, diamars anochi, dia 28 di Maart, tabata tin conexion for di e embahada Hulandes na Cuba cu director TNO Caribbean, Jan Ebbing, na Aruba. TNO ta un instancia di investigacion Hulandes, ta entre otro activo na Cuba. Dentro di poco TNO Caribbean, lo firma un acuerdo di cooperacion cu e centro di desaroyo pa construccion Cubano (CIDC). Akinan lo bay desaroya casnan “zero energy” na Havana. Tambe lo bay tin intercambio di conocemento riba tereno di construccion duradero hunto cu e partnernan internacional di TNO (entre otro universidadnan di Hulanda).
Minister Bussemaker ta lidera momentaneamente un mision di reino di tres dia na Cuba, cu representantenan di ministerio y institucionnan for di Hulanda, St. Maarten, Aruba y Corsou. Un transmision di video digital entre Havana (Cuba) y Oranjestad (Aruba), a forma e comienso pa e apertura di e espacio “Orange Plaza” na e embahada: un luga flexibel pa traha y reuni pa compania y institucionnan for di Reino na Cuba. E construccion di “Orange Plaza” a keda anuncia aña pasa Januari durante e mision economico di reino, bao di liderasgo di Minister Ploumen. E embahada na Cuba, a wordo reconstrui durante e ultimo lunanan y a wordo entrega recientemente.