Minister Bikker ta menasa di kita permiso di casino si nan limita operacion

Minister di Husticia mr. Andin Bikker, kende ta encarga cu asuntonan di casino, ta lamenta cu Parlamentario sr. Marlon Sneek a mal informa y crea un impresion comosifuera cu Gobierno lo a otorga un permiso special pa un casino na un hotel. Tur casino-vergunning, e ta bisa,  ta standaard concipia pa Departamento di Asuntonan Huridico y den e permisonan ta para standard e tipo di weganan cu ta usual den un casino. Por ehempel bankcraps, wega di carta, roulette, wheel of fortune, bingo of keno, y weganan special gekeur.

Gobierno no lo permiti pa ningun hotel cu tin permiso pa casino bay mal uza un casino-vergunning y bay purba limita esaki na weganan di mashin, ya cu esey lo no wordo considera un casino conforme e permisonan. Aruba ta un destinacion turistico renombra cu ta competi cu otro destinacionnan cu tin casino como un atraccion den hotel, y pues tin pa mantene un standard halto: ora ta papia di casino, ta casino kiermen, no un ‘gamehall’ chikito.

Dus al contrario cu e impresion cu Parlamentario Sneek kier a crea, no ta existi ningun permiso special pa casino, tur casino vergunning ta standaard traha door di Departamento di Asuntonan Huridico conforme maneho y modelo estableci pa hopi aña caba. Gobierno no lo permiti ningun vergunninghouder bay desvia di e naturalesa y e intencion tradicional di permiso pa habri casino. Sino lo por yega na retracta un permiso.

Awe mainta Minister di Husticia Andin Bikker y Minister Glenbert Croes di Asuntonan Social y Labor a reuni cu representantenan di Sindicato FTA pa subraya cu Gobierno ta para banda di e clase trahado a base di maneho estableci pa hopi aña caba. No lo permiti pa ningun hotel cu tin permiso pa casino bay mal uza un casino-vergunning: casino kiermen casino cu weganan tradicional, punto.

 

Comments

comments