DEN HAAG – Minister Plenipotenciario Guillfred Besaril tabata parti di e proyecto “Human Library” cual a tuma lugar na e Biblioteca Central di Rotterdam. Sr. Besaril hunto cu un grupo di otro personahenan pa e ocacion aki tabata un “buki bibo”. Esta e publico por inscribi pa lesa un buki bibo, pero en realidad nan ta tene un combersacion cu e persona na e momento ey.
Meta di Human Library ta pa invita diferente persona cu diferente ofishi of base, cu por conta por ehempel nan storia y nan experencia. E “lesador” di e buki bibo por haya un mihor bista riba e diversidad di e comunidad y combati na e mesun tempo prehuicio cu ta existi cerca hendenan.
Sr. Besaril tabata e buki cu e titulo “Arubaan” di e manera ey duna e publico e oportunidad pa papia cu un Arubano y asina entre otro cera mas conoci di unda e ta bin, ki aparencia e tin. Minister Besaril a bisa cu el a experencia e proyecto aki como uno hopi positivo. El a combersa cu diferente hende cu tabata interesa pa conoce e Arubano. ‘Un señora a bin papia cumi, pasobra e tin algun bisiña Antiano y nan ta hopi pafo y ta toca musica duro”. E mandatario a splica e señora cu Antiano y Arubano ta hendenan contento. Nos ta custumbra ta pafo y gosa di bida. Despues di a tende e argumentonan di Sr. Besaril e señora a bisa cu awor e tin mas comprension pa e conducta di su bisiñanan. “Asina mi a purba na cambia e percepcion di e persona aki. Esaki ta stapnan chikito, pero hopi biaha ta na un manera asina bo ta logra dialogo cu personanan cu ta cana cu prehuicio rond”, asina minister Besaril a bisa.
Na final di e dia a resulta cu Sr. Besaril tabata un di e “bukinan bibo” mas lesa.
Potretnan ta cortesia di Cas di Aruba