DEN HAAG, Hulanda – Minister Plenipotenciario Guillfred Besaril tabata anfitrion di un Business Event cu Arubahuis y Caribbean Business Hub (CBH) conhuntamente a organisa na Arubahuis. Un anochi hopi exitoso cu a conta cu casi 60 persona for di mundo di comercio. Tambe presente tabata ta Representante di Aruba na Union Europeo Eddy Paris.
E anochi a wordo habri cu canto di nos himno nacional Aruba Dushi Tera pa e hoben Jonathan Croes. Despues presidente di CBH, Nico de Visser a yama tur hende bon bini y a duna un splicacion kico CBH ta haci. Nan ta un plataforma pa stimula inversionistanan pa cuminsa negoshi na e islanan di Reino Hulandes den Caribe.
Minister Plenipotenciario Guillfred Besaril den su discurso a menciona e sectornan unda Gobierno ta concentra riba dje, cu ta turismo, sector primario, economia di conocemento, sector logistico, economia circular y economia creativo. E mandatario a mustra riba e cooperacion cu ta existi entre Arubahuis y organisacionan empresarial na Hulanda, manera VNO-NCW, NFIA y RVO, pa sondea e posibilidadnan pa inversionnan na Aruba. Esaki tambe ta caso cu organisacionnan na Aruba, manera Arina, Atia, Kamer van Koophandel y e diferente ministerionan. Ambos ta hopi importante pa e trabao di Arubahuis. ‘Un di e sectornan cu mi a bin ta concentra riba dje desde cu mi a bira Minister Plenipotenciario ta e sector primario. Nos Gobierno ta convenci cu e sector aki pa medio di desaroyonan innovativo, tin hopi potencial pa crece. P’esey mi a drenta den contacto cu institutonan y companianan cu por haci e diferencia den agricultura na Aruba,’ asina Sr. Besaril a bisa.
E mandatario a sigui bisa cu Aruba tin casi 120 mil habitante y mas cu 1 miyon turista cu ta bishita e isla y cu ta keda minimal un siman na Aruba. ‘Na e momento aki nos ta importa 95 porciento di loke nos ta consumi. Cu innovacion e porcentahe aki por bira menos. Nos ta ripara cu tin desaroyonan positivo bou di nos cunukeronan. Siman pasa mi a bishita Aruba cu un empresa cu ta destila awa di laman den awa cu por wordo usa pa agricultura. Esaki ta e oportunidadnan cu Aruba por haci uso dje pa yuda stimula nos cunukeronan. P’esey nos ta keda dialoga cu instancianan manera Rijksdienst voor Ondernemend Nederland (RVO), ministerio di Agricultura di Hulanda, Universidad di Wageningen, Van Larenstein Hogeschool, Priva, Grow Group, Sol Teq Energy y otro companianan potencial na Hulanda pa trece e conocemento aki Aruba,’ segun Minister Besaril.