Minister Sr. Guillfred Besaril, Ministro Plenipotenciario di Aruba recientemente a ricibi invitacion, pa medio di e organisacion turistico COTAL (“Confederación de Organizaciones Turísticas de América Latina”), pa representa Aruba durante un audiencia priva cu Papa Francisco. E audiencia aki lo tuma luga dia 6 di december 2017 na e ciudad di Vaticano, Roma. Den e dianan prome cu e audiencia importante aki Minister Besaril lo ta na Roma, Italia caminda e lo atende varios reunion cu mandatarionan di dicho pais y dignatarionan di e ciudad di Vaticano. Minister Besaril lo clausura su bishita cu un audiencia priva cu su Santidad Papa Francisco.
Minister Besaril ta forma parti de e delegacion di COTAL, presidi pa Don Armando Bojorquez Patron. E delegacion ta consisti di mas di 45 empresarionan importante den e mundo turistico Latino Americano, kendenan lo atende tambe un audiencia general cu Papa na e ciudad di Vaticano, Roma. Banda di esaki lo tin varios encuentro cu empresarionan den e sector turistico Italiano. Tur esaki den cuadro di e 60 aniversario di COTAL.
Minister Besaril lo habri e serie di reunionnan general entre empresarionan Italiano y Latino Americano di dia 4 di december. Durante e diferente encuentronan Minister Besaril lo percura pa informa esunnan presente di tur locual Aruba tin di brinda como destinacion turistico. Banda di ta un honor grandisimo pa Aruba di por a ricibi e invitacion pa e audiencia cerca Papa Francisco, e bishita di Minister Besaril na Vaticano ta un momento historico pa nos isla. Durante e bishita aki e Santo Papa lo bendiciona e bandera di Aruba, cual bandera na su turno, Minister Besaril lo entrega na Minister Presidente Wever-Croes na su yegada bek na Aruba. E bandera bendiciona aki lo tin su luga permanente den Bestuurskantoor di Aruba. Di parti gobierno di Aruba Minister Besaril lo regala Papa Francisco un cuadra imprimi riba canvas di nos precioso Kapel di Alto Vista, potret saca pa e hoben fotografo Ayrton Tromp.
Aruba recientemente a ricibi e grato noticia di a wordo honra cu un posicion den hunta di directiva di e COTAL. Pa prome bes Aruba lo tin representacion como pais den e organisacion turistico Latino Americano, despues cu pa añanan Aruba a resorta bou di e representacion di Hulanda den dicho organisacion. Esaki ta un logro grandi cu lo habri hopi porta y oportunidadnan den sector turistico pa Aruba. Señora Lic. Victoria “Vicky” Eugenia Pérez, presidente di Asociación Turística del Caribe lo ta Aruba su representante den COTAL.