Minister Plenipotenciario Guillfred Besaril ta extende un felicitacion na e pueblo di Aruba cu awe ta di fiesta pa celebracion di 65 aña di nos escudo nacional.
E escudo di Aruba e wordo diseña na 1955 na Amsterdam y desde e dia ey a sirbi como un di e simbolonan di Aruba. E escudo di Aruba ta consisti di shete elemento: e mata di aloe, hooiberg, dunamente di man, wiel, cruz, leon y rama di laurel.
Den e prome cuartel e mata di aloe ta refleha e fuente di entrada mas importante di e pasado industrial di Aruba. Den e di dos cuartel e cero di Hooiberg, como parti di nos identidad, ta simbolisa e Isla di Aruba cu ta sali for di lama. E color berde, como color di alegria, ta expresa alegria pa e autonomia obteni. E liñanan ondeante ta simbolisa nos lama. Den e di tres cuartel, dunamento di man ta simbolisa e lasonan amistoso cu otro nacion y pueblo, tanto den sector politico como tambe economico y cultural. Den e di cuater cuartel, e wiel ta representa e industria como fuente di bida mas importante pa nos isla. E cruz ariba e escudo ta simbolisa devocion y fe. E leon ariba e escudo ta representa forsa y generosidad; cualidadnan subraya pa medio di e color cora. Y den e ultimo cuartel tin e ramanan di laurel ta simbolisa paz y Amistad.
Minister Besaril: ‘E escudo hunto cu nos himno nacional Aruba Dushi Tera y nos bandera ta parti di nos identidad y como Minister Plenipotenciario na Hulanda mi ta felicita e pueblo Arubanan riba e dia importante aki.’