DEN HAAG – Minister Plenipotenciario Guillfred Besaril a presencia den Ridderzaal diamars cu a pasa e recepcion pa tuma despedida di presidente di Eerste Kamer Ankie Broekers-Knol. Na mesun momento a tuma tambe despedida di tur e miembronan di Eerste Kamer cu lo no regresa mas na momento cu e Eerste Kamer nobo keda instala otro siman 11 di juni.
Sr. Besaril den nomber di Gobierno di Aruba a gradici sra. Broekers-Knol pa su dedicacion como presidente di Eerste Kamer pa fortifica e relacionnan den Reino Hulandes en particular den contactonan interparlamentario. Como muestra di gratitud minister Besaril a entrega un regalo na sra. Broekers-Knol y a desea tur clase di exito den futuro.
Por cierto cu awe a keda anuncia cu Ankie Broekers-Knol a keda nombra como Secretario di Estado pa Asilo y Migracion. E funcion aki a bira liber despues cu Mark Harbers a retira como Secretario di Estado.
Potretnan ta cortesia di Cas di Aruba