DEN HAAG – Minister Plenipotenciario Guillfred Besaril a haci un bishita di cortesia na e oficina di Representante di Hulanda na Aruba VNO. E mandatario a keda ricibi pa e representante suplente Gijs Baars.
Durante e bishita a papia riba desaroyonan importante cu lo tuma luga e aña aki den Union Europeo. Na prome luga e situacion cu e Brexit, unda Reinado Uni lo sali for di Union Europeo. Esaki lo trece cambionan grandi pa e paisnan LGO, ya cu hopi di e teritorionan Ingles lo perde e status aki. P’esey lo mester enfoca riba kico esaki ta bay nifica pa e paisnan LGO Frances y Hulandes. E situacion aki tin consecuencianan economico pa Aruba y cada decision na Brussel tin su influencia pa cu Aruba.
E di dos punto cu a papia riba dje ta e eleccion pa parlamento Europeo na mei binidero. Por bisa cu e eleccionnan aki no ta biba bou di nos hendenan na Aruba. Segun Minister Besaril lo mester bin mas informacion riba kico Union Europeo ta nifica pa e islanan aki pa asina crea mas conscientisacion bou di e poblacion na Aruba. Pa logra esaki mester tene cuenta cu dos punto. Na prome luga: e drempel pa vota ta hopi halto. Arubanonan cu kier vota mester registra nan mes prome. Di dos punto ta pa logra haya mas animo pa hendenan bay vota lo mester bin cu candidatonan di e paisnan di Reino den Caribe riba e listanan. Na opinion di Minister Besaril e candidato aki lo mester por haya un luga prominente riba un di e listanan politico cu ta participa na e eleccion aki. ‘Despues di e Brexit e kiesdrempel lo bira mas abou, pero no ta kita afo cu un candidato ta wordo tuma na serio si e haya un posision prominente riba e lista,’ asina Minister Besaril a bisa.
Pa es motibo Arubahuis ta traha masha estrecho cu Europahuis na Den Haag pa canalisa camindanan pa hisa e participacion di Arubanonan na Aruba na eleccionnan Europeo.
Sr. Baars a bisa di ta comparti e opinion di Minister Besaril y cu VNO di su parti tambe lo mira unda nan por contribui pa haci posibel pa Arubanonan na un manera mas facil por vota pa e siguiente eleccion pa parlamento Europeo.
Potretnan ta cortesia di Cas di Aruba