‘Awe mas cu nunca e ekipo di Arubahuis tin cu bai hunga un rol intermediario en bista di tur e temanan cu COHO ta trece cune. Tambe e “timeframe” den cual tin di ehecuta cierto temanan ta trece un reto adicional. E ta un paketa bastante complica y e ta exigi cu e dinamica di trabao di Arubahuis lo mester cambia significantemente. Esaki ta e realidad nobo cu nos ta habri 2021 cune,’ asina Minister Plenipotenciario, sr. Guillfred Besaril, a declara na su salida di e reunion entre Conseho di Minister di Aruba cu e Secretario di Estado pa Asuntonan di Reino, sr. Raymond Knops y su delegacion.
E mandatario a sigui elabora cu esaki ta un momento hopi importante pa e staf huridico di Arubahuis cu mester brinda su persona e asistencia huridico necesario pa canalisa cierto puntonan critico den e relacion cu COHO y e profesionalnan tanto di Aruba como Hulanda cu a bin ta trahando hunto desde Juni 2020 te na ora cu Pais Aruba a firma e acuerdo December ultimo. Minister Besaril: ‘E tabata un periodo hopi importante pasobra bo ta na inicio di e desaroyo cu e entidad; nos a mira literalmente su nacemento. Pues e reunion tabata hopi importante pa di awor en adelante tur desaroyo sucede na un manera structura na beneficio di Pueblo di Aruba.’
Sr. Besaril a indica cu den e acuerdo como Gobernacion 2017 – 2021 a identifica caba cu tabata tin diferente areanan caminda cu Gobierno mester a trece cambio. ‘Cambio den mentalidad, cambio den structura y cambio den e manera di traha. Tambe nos a identifica cu esaki ta e momento propicio pa haci esaki conforme e acuerdo menciona. Pesey como un di e “Bewakernan” di e programa di gobernacion di Gabinete Wever-Croes, e tabata importante p’ami tabata sinta hunto cu un y tur envolvi den e desaroyo nobo aki pa nos por sigui hiba e mensahe cu Aruba mes por, claro cu e asistencia di Hulanda y cu Arubahuis t’ey pa canalisa e proceso aki for di Hulanda,’ Minister Plenipotenciario, sr. Guillfred Besaril, a termina encuanto e palabracionnan y reunion entre Aruba y Hulanda.