Minister Plenipotenciario Guillfred Besaril durante di su bishita di trabao na Aruba a tene un reunion cu Sheila van Veen, director di Pensioenfonds APFA. E minister a wordo acompaña pa director a.i. di Aruba mr. Glenn Ling.
Meta di e reunion aki tabata pa brainstorm y papia pa mira si APFA por hunga un rol den renobacion di e edificio di Arubahuis na Hulanda. Segun e mandatario e reunion tabata sumamente interesante y cu APFA a pone algun construccion basta interesante riba mesa. ‘Pa asina nos por renoba e edificio, pero toch na un manera cu e no ta bira un golpi pa e pueblo of e ta bira un projecto den cual bo ta bisa cu atrobe placa significante ta bai deposita den dje,’ asina minister Besaril a bisa.
E mandatario a acentua cu ta buscando alternativanan pa asina logra na preserva un edificio cu ya pa 25 aña a sa di fungi como Cas di Aruba na Hulanda. Besaril: ‘Un edificio di cual hopi hende tin un cariño particular pe. E tempo cu e tin caba, cu e tabata sirbi como tal, ta haci cu e tin un lugar special den comunidad di Aruba. Nos ta bezig na purba di haya e caminda corecto pa asina aki e bira un projecto cu nos por sostene financieramente como gobierno, pa riba un manera responsabel y cu ta pas tambe den e kadernan di presupuesto cu nos ta manteniendo na e momento aki,’ segun declaracion di Minister Plenipotenciario Guillfred Besaril despues di su reunion cu APFA riba posibilidadnan pa renobacion di Arubahuis na Hulanda.