Minister Plenipotenciario Guillfred Besaril a cera e registro di condolencia pa Juan Chabaya (Padu) Lampe na Arubahuis. Na e ocasion aki sr. Besaril a expresa su sentimento cu e fayecimento di Padu Lampe 28 di November ultimo. ‘Manera mi a scirbi den e registro di condolencia mi a gradici Padu pa loke el a nifica pa pueblo di Aruba. E ta nos tata di Cultura, e ta hunto cu Rufo Wever (dfm) autor di nos Himno Nacional. E ta laga un bunita herencia atras, e ta laga un regaldo su bida eigenlijk tabata un regaldo pa pueblo di Aruba. Pesey di curason na nomber di un y tur, staf y personal di Arubahuis na Hulanda, nos kier a manda un palabra di sentido pesame ainda na e famia, aunke nos a hacie caba formalmente.’ ‘Pero mirando cu awe nos ta cera e registro pa asina aki tambe comparti un poco e sentimento cu e famia, pero sin lubida con grandi Padu tabata ta; kico tur ela significa pa nos. E ta un momento tristo pa nos, pero alabes un momento den cual un gran persona ta keda marca pa resto di su bida den historia di Aruba y di Aruba su cultura,’ tabata palabrana di Minister Plenipotenciario Guillfred Besaril pa cu nos Tata di Cultura Padu Lampe. E registro di condolencia lo wordo entrega na famia di Padu Lampe. Nota di redacion: E potret ta cortesia di Cas di Aruba.