DEN HAAG – Minister Plenipotenciario di Aruba Guillfred Besaril a atende e prome reunion di e grupo di trabao den cuadro di e eleccion pa e Parlamento Europeo cu lo tuma lugar otro aña na mei. E reunion aki – cu ta un initiativa di Europahuis na Den Haag y Ocan – ta pa intercambia opinion riba e posibilidad pa stimula cu mas Hulandesnan Caribense tanto den Caribe como na Hulanda ta conciente di e eleccion aki.
Durante di e intercambio e participantenan a constata cu e eleccion pa Parlamento Europeo no ta biba cerca nos hendenan. Den pasado cu tabata tin candidatonan Arubano riba listanan politico, bo por a mira mas entusiasmo por ehempel na Aruba pa bai vota. Pesey ta sumamente importante pa mira pa e lista di candidatonan mester ta mas diverso, cu candidatonan Arubano y asina mas visibel por ehempel pa e votador Arubano.
Un otro punto hopi importante cu a bin riba mesa ta cu e ciudadanonan di e pais y islanan den Caribe mester tin mas conocimento riba ki terenonan Union Europeo ta envolvi pa medio di proyectonan na Aruba. Mas conocemento riba esaki por hisa e entusiasmo bou di e votador na Aruba pa bai vota. Esaki por keda realisa atrabes di mas publicacion of propaganda. Un otro manera pa trece esaki mas padilanti bou di e poblacion ta pa bin cu un conferencia riba e tema di eleccion pa Parlamento Europeo y cu esaki por wordo transmiti via di e canalnan di televicion na Aruba. Durante di e conferencia aki lo mester enfoca – banda di e proyectonan di Union Europeo na e islanan – tambe riba mas concientisacion di e lasonan di e islanan cu Union Europeo.
Pa motiva Arubano pa bai vota, mester cambia e systema di vota. Awor ta asina cu e persona mester registra su mes prome pa por haya su stembiljet. Tur presente unamimo ta di opinion cu esaki ta forma un drempel hopi halto pa e votador. A haci palabracion pa mira con por trece cambio den esaki.
Minister Besaril a boga pa e islanan tin un liason hopi cerca di parlamentarionan Europeo pa asina nan por ta na altura di e situacion na e islanan.
Potret ta cortesia di Cas di Aruba