Minister Bermudez y Universidad di Aruba ta inaugura ‘Double Degree Program’

Dialuna atardi Minister di Finanzas, Angel Bermudez conhuntamente prof. dr. Anouk Bollen-Vandenboorn di Universidad di Maastricht y Universidad di Aruba a inaugura oficialmente e “Double Degree Program in International & European Tax Law” pa aña 2016 – 2017.

Prome cu oficialisa e programa di studio aki, e mandatario a haci entrega di certificado na 9 studiante cu a completa e ‘voorpgrograma’ exitosamente y cu a keda admiti den ‘Double Degree Program’ y asina forma parti di e prome grupo cu lo expande nan conocemento riba tereno di leynan fiscal internacional y Europeo.

E mandatario a probecha e ocasion pa hiba palabra y comparti cu e grupo aki parti di su experiencia como consehero fiscal riba nivel internacional. Na mes momento Minister Bermudez a haci referencia na e caso internacional unda cu recientemente e compania “Apple” a haya un boet di e comision di Union Europeo pa motibo cu nan a evadi impuesto na Irlanda.

Den e caso di Aruba, e mandatario a splica cu ainda tin tipo di peticionnan riba tarifa special, areglo di pago of “ganga” cu sa presenta te dia di awe cu simplemente no por wordo honra. Pues e responsabilidad di generacion nobo di specialista y conseheronan fiscal internacionalmente y na Aruba ta mas grandi cu nunca.

E prestigioso “Double Degree Program” aki ta conta cu profesornan internacional di pais nan manera Alemania, Hulanda, Merca, Venezuela y Aruba y ta dirigi specialmente na studiantenan of profesionalnan cu ya caba eherce nan profesion of kier eherce na un nivel internacional.

Segun Minister Bermudez, e ‘curriculum’ di e programa aki en berdad ta uno intensivo, pues e mandatario ta desea e tur studiante hopi exito y cu en berdad en grupo aki por continua nan carera profesional na nivel internacional tambe. Finalmente e mandatario a expresa cu p’e ta un honor pa inicia e programa di studio aki y e ta spera cu durante e programa aki e studiantenan inverti nan tempo tambe riba aspectonan manera norma y balornan cu nan mester tin presente ora cu nan eherce nan funcion riba tereno di leynan fiscal.

Comments

comments