Entrante 1 di Januari 2016, Gobierno di Aruba a scoge pa implementa un ‘kader’ di responsabilisacion nobo pa subsidio unda cu e instancianan ta pidi subsidio a base di e programa di exigencia y e metanan di maneho di e ministerio en cuestion. Durante e entrega oficial di e manual aki siman pasa, Minister di Finanzas, Angel Bermudez a indica cu e prestacionnan y e resultadonan di e servicionan suministra (outputs) lo para central den e maneho aki.
E mandatario ta splica cu debi na e maneho nobo di subsidio, a dicidi di institui entrante 1 di Januari 2016 Coördinatiebureau Overheidssubsidie (CBOS). E departamento aki tin como meta pa realisa e maneho di subsidio nobo, esta e subsidio fiha riba ‘output’, y percura pa continuidad di esaki. Banda di esey CBOS ta sostene buskeda y aporte di otro fuentenan di financiamento tambe.
Pa cu e sistema di maneho nobo aki, CBOS a traha e Manual di subsidio Gubernamental di Aruba (Handboek Overheidssubsidies Aruba). Segun CBOS, e manual aki ta destina como fuente di informacion pa e instancianan (e miembronan di directiva y e directivanan) cu ta ricibi subsidio gubernamental, e ministerionan cu nan maneho di directiva, Directie Financiën y Coördinatiebureau Overheidssubsidie (CBOS) mes.
No tin duda cu e manual aki ta un medio practico cu ta duna sosten na e ‘stakeholdernan’ y ta splica tambe e partinan cu ta importante pa otorgamento di subsidio door di Gobierno, entre otro e instruccionnan y e proceduranan encuanto e proceso di subsidio.
E meta di e manual, ta pa structura miho e proceso di subsidio na un forma standarisa y uniforme tanto pa Gobierno como pa e instancianan subsidia. E manual aki ta sirbi tambe como guia pa duna sosten y claridad den e relacion entre Gobierno (dunado di subsidio), particularmente e minister corespondiente y e instancianan subsidia (ricibido di subsidio) pa loke ta trata subsidionan di gobierno.
Sra. Marilyn Ellis conhuntamente cu Jeanine Marsman y Aaron Wernet di CBOS a elabora riba e manual aki cu na mes momento tambe a forma parti di e tesina di Sra. Marilyn Ellis. Pues e Minister Bermudez a keda sumamente satisfecho cu e resultado final y a probecha di e ocasion pa felicita Sra. Ellis cu a termina su estudio di Master of Business Administration (MBA) na Business School Nederland exitosamente.
CBOS ta e oficina encarga pa duna conseho y sosten na e ministerionan, e directivanan di maneho y e instancianan en cuanto e subsidionan di Gobierno. CBOS tambe ta responsabel pa (co)-desaroya, inicia, stipula, controla y evalua financiamento di criterio cu ta dirigi riba ‘output’. CBOS ta ubica na L.G. Smith Blvd. 76, tel. 528-4900 ext. 5042/ 5010/ 5020.
