Diamars anochi Minister interino di Asuntonan Social, Labor y Hubentud, Angel Bermudez tabata presente na e gran celebracion di 60 aniversario di Casa Cuna. E mandatario a hiba un discurso caminda el a manifesta cu despues di 60 aña en Stichting Casa Cuna Progreso a demostra cu e merece su luga den nos comunidad.
Minister Bermudez a sigui conta cu como un welo di 2 nieto, e ta reconoce e importancia pa tur mucha sinti nan mes na cas y sigur. Casa Cuna ta haci hopi mas cu djis cuida pa criaturanan cu ta den un situacion familiar critico. Casa Cuna ta ofrece tambe un ambiente di amor, un bon calidad di bida y guia pa e muchanan aki por crece den personanan responsabel, saludabel y cu balornan moral den nos comunidad.
Segun e mandatario, a pesar cu den transcurso di añanan e problemanan social por cambia, keto bay tin muchanan cu ta sufri riba nos isla pasobra nan no ta conta cu e base fundamental den nan prome fase di bida y eynan ta unda cu Casa Cuna ta brinda nan e proteccion tambe cu nan mester pa nan desaroya nan mes na nan maximo potencial.
“Mi ta consciente cu den e transcurso di 60 aña Casa Cuna a haya hopi contratiempo, pero nan semper a sa di persevera. Mi ta sigur cu awe nan ta caminda cu nan ta, pasobra nan tin un tremendo staf y nan a conta tambe cu varios sponsor y boluntario durante aña. Mi ta spera cu esey tambe por sigui y naturalmente cu subsidio di Gobierno tambe”, asina Minister Bermudez a expresa.
Ademas, durante e anochi aki Casa Cuna a anuncia nan proyectonan nobo cu lo enfoca specialmente riba e mamanan hubenil y pa esaki e mandatario interino di Asuntonan Social, Labor y Hubentud ta spera cu Gobierno tambe lo por duna un man pa nan por sigui haci e trabou importante aki pa nos comunidad.
“Mi ta spera cu den futuro Casa Cuna por sigui cu e tremendo esfuerso aki y cu nan por sigui conta cu e sosten di comunidad, sponsor y boluntarionan cu durante 60 aña a aporta grandemente. Mi ta gradici nan tur y mi ta desea nan tur clase di exito pa e proximo añanan.”