Diabierna ultimo Minister di finansas, Angel Bermudez hunto cu director di Departamento di Aduana y Astec tabata na waf di Barcadera pa asina mira e ultimo desaroyonan di e container scanner cu despues di 2 aña for di servicio a keda completamente restaura pa tecniconan di Siemens.
Un di e metanan principal di e mandatario tabata pa mehora e calidad di trabou y servicio cu Departamento di Aduana ta duna y e scanner aki tabata un inversion di 5 miyon florin cu ta aporta grandemente na esaki. “Desde cu mi asumi e cargo di Minister di Finansas pa mi e tabata un prioridad pa reactiva e scanner aki. Den 2 minuut e ta saca un scan di e containernan y cu e imagen nan aki bo por analisa hopi lihe kico precisamente tin aden y si berdaderamente esaki ta cuadra cu loke ta para den e manifesto”, asina e Minister Bermudez a splica.
Pa e mandatario e hecho cu e instrumento importante aki no tabata funciona pa dos aña caba e situacion tabata wordo considera como un destruccion di capital. Banda di esey e scanner ta acelera e procedura di “klaar in” un container, lo cual ta yuda e cuerpo duanero pa haci nan trabou mas eficiente cu e ekipo digital aki y tambe e ta contribui na un procedura hopi mas lihe pa e comerciante tambe.
Segun director di Departamento di Aduana desde un principio e scanner a yuda aduana hopi y por a nota e progreso den e trabounan di e coleganan tambe.
Mientras tanto e ekipo di Siemmens lo duna 10 duanero di waf cu ta bay haci e analisis di e scan un training, pa nan por haci uzo di esakinan pa controla e contenido di e containernan y tambe 5 colega di e seccion di “douane recherche” lo forma parti di e training tanto pa e parti fiscal como no- fiscal.
Esaki ta significa cu e duaneronan no mester bay habri e container y controla visualmente kico tin aden. E analistanan di duana ta ricibi e imagennan y a base di nan propio observacion, analisis y e documentonan cu nan tin eynan nan por determina si e container ta cumpli cu loke cu a wordo registra cu ta su respectivo contenido. Pronto tur esunnan cu ta envolvi y cu tin de haber cu importacion lo por tin bentaha y por gosa di e sistema aki.
Prome cu coleganan di aduana cuminsa traha cu e container scanner oficialmente, director Croes di Departamento di Aduana lo elabora riba un procedura oficial hunto cu director de I’Isle di Astec pa asina determina con, ki ora of momento di dia y cu ki regularidad e scanner aki lo wordo uza.