Diabierna mainta a tuma luga e legalisacion di e traspaso oficial di e refineria pa Gobierno di Aruba. Na prome instante Minister di Finanzas, Angel Bermudez a funda e compania local di Gobierno, esta, Refineria di Aruba N.V. dilanti notario y despues a firma hunto cu Valero e traspaso di e refineria cu su pertenencianan pa Refineria di Aruba.
Cu e traspaso aki Refineria di Aruba a bira propietario di e instalacionnan na balor di 350 miyon dollar, tambe e ‘transhipment terminal’ na balor di 200 miyon dollar y finalmente e compania di combustibel cu algun ‘pompstation’ na balor di 40 miyon dollar. “Cu e transaccion aki e balansa di pais Aruba a mehora cu mas di mey biyon dollar specificamente na propiedad”, asina Minister Bermudez a informa.
Durante e reunion diasabra mainta tambe a tuma luga e firmamento di e contract di huur di e instalacion y terminal na CITGO, cu ta bay rehabilita esakinan pa operanan pa un periodo di 15 pa 25 aña consecutivo. Pa cu esaki CITGO lo paga Gobierno un huur di 18 miyon florin anualmente ademas e impuesto corespondiente.
E mandatario di finanzas a splica cu segun e planificacion pa ora cu e refineria ta den operacion ta trece cun’e al rededor di 1000 cupo di empleo directo y indirecto pa nos pueblo.
Minister Bermudez a expresa di ta sumamente orguyoso di por a forma parti di e deliberacionnan aki. “Esaki lo trece hopi sinergia pa nos Pais y ademas ta ofrece nos e oportunidad pa renoba nos sector petrolero segun e tecnologia mas moderno di mundo!”, asina e mandatario a sigura.