Minister di Integracion Benny Sevinger a presencia y participa den ceremonia caminda empleadonan di Departamento di Integracion y Maneho di Stranhero (DIMAS) a haci promesa cu ta resguarda integridad di nan funcion como trahado publico. Cada miembro di e ekipo a huramenta dilanti di Su Excelencia Gobernador Interino, Sra. Ella Tromp-Yarzagaray.
Minister Sevinger a hiba palabra felicitando cada trahado pa e compromiso cu a haci y e responsabilidad cu a acepta, recordando y enfatisando e importancia cu nan trabou tin pa cu desaroyo y bienestar di pais Aruba. “15% di e forsa laboral cu ta hiba nos isla dilanti tur dia ta consisti di stranhero,” asina Minister a comenta.
Adicionalmente e mandatario encarga cu integracion a mustra comprension pa e retonan cu e trabou den DIMAS por trece cu ne, pidiendo e personal na mesun momento pa corda cu cada cliente ta un humano, cu nomber; un prohimo cu merece respet y ayudo pa alcansa su metanan.
E promesa cu e trahadonan a haci ta inclui e siguiente puntonan: 1. No lo acepta ningun promesa y tampoco ningun regalo a cambio di haci of no haci algo den cuadro di nan funcionnan; 2. Lo haci nan trabounan conforme e leynan y reglanan cu ta vigente y cu lo tene e interes di Aruba y cu lo garantisa y promove e integridad di su funcionamento; y 3. lo aplica cautela necesario ora ta dispone di informacion den cuadro di nan trabou cu tin of nan mester por comprende cu tin un caracter secreto of ta confidencial y pues cu no lo traspasa esakinan, sino pa esnan cu segun ley mester haya esaki of cu den cuadro di nan trabou mester haya dicho informacion.
Hunto cu directora di DIMAS, Sra. Kathy Paskel y directora di Departamento di Recurso Humano, a saca potret cu tur e empleadonan pa marca e momento importante aki.