Diamars ultimo Minister di Infrastructura Benny Sevinger a reuni cu Asociacion di banconan y demas institutonan financiero riba e maneho nobo di gobierno pa loke ta otorgamento di tereno. Den e dianan aki mil carta ta sali di e despacho di Minister Sevinger pa esnan cu ta wardando riba nan tereno. Cu e carta aki e persona ta bay su banco cu lo procesa esaki teniendo cuenta solamente cu su entrada pa asina cosnan cana mas lihe. Asina e persona haya luz berde di banco e por bay DIP. Durante e reunion di diamars a keda palabra cu banco y institutonan financiero lo coopera cu gobierno y ta mas flexibel den duna hypotheek.
E areglo aki no ta conta pa esnan cu ya caba tin un tereno y no ta kedando cla cu nan hypotheek. “Un hende cu tin un tereno – si ta despues di 2006 – a pasa caba den e proceso di banco y a clasifica pa un hypotheek. Si ta prome cu 2006, e rekisitonan tabata menos streng y e persona tabata haya un tereno den erfpacht y tabata construi su cas hunto cu famia manera antes tabata e caso. Na 2001 te 2006 nos a haci un analisis cuanto di e terenonan ey tin y a resulta cu tabatin alrededor di 2 mil parcela rond di Aruba unda tin hende cu tin e tereno den erfpacht, pero cu nunca a traha un cas riba dje.” Sevinger a splica cu intencion ta pa manda e hendenan aki un carta pa recorda nan cu nan tin un tereno cu nan a haya di gobierno y kico ta e motibo cu nan no a construi riba dje y wak si por yuda nan. Si ainda despues di esaki e ‘doño’ di e parcela no traha un cas, lo mester bay over na ‘onteigening’. “Esaki ta un proceso largo y hunto cu Parlamento mester wak con haci e tramitenan aki. Pero esaki na e momentonan aki no ta nos prioridad. Prioridad di gobierno ta e terenonan cu nos kier saca awor.”
Minister Sevinger a informa cu si mira den ROP (Ruimtelijk Ontwikkelingsplan) na e momentonan aki, ta poni bon cla cu ‘den un crecemento economico di 3% a base anual, gobierno hunto cu sector priva mester percura pa otorga mas o menos mil parcela pa aña. Esaki ta vivienda, apartamento etc. mester wordo traha pa aña pa baha e demanda di esnan cu ta wardando pa traha un cas. “Awor aki nos no ta cumpliendo cu esey. Cu tur e critica cu tin tur rond encuanto rosamento, den shete aña nos a duna te awor 900 tereno. Esey kier men cu nos ta cana hopi tras di loke ROP ta indica. Eyden ta poni bon cla cu gobierno mester duna 600 pa 700 tereno pa aña.”
Sevinger a bisa cu mirando esaki gobierno a traha riba un maneho di ‘inbreiding’ loke ta encera cu den e barionan unda tin infrastructura caba, a bay wak cua ta e terenonan cu gobierno tin y verkavel nan. “Nos a haya cinco aki, dies ey, shete aya y asina nos a yega na e mil terenonan aki. Pero, ta yega un momento den futuro cu mester bay den uitbreiding, traha casnan di piso, haci e parcelanan mas chikito, haci e rooilijn mas cortico. Tur esaki ta cosnan cu ta den proceso, pasobra Aruba no ta crece ni bira mas grandi. Nos kier conserva naturalesa, pero nos kier tambe pa hende por traha nan cas y eynan ta buscando e balansa.”