Fusion Center ta un acuerdo cu a keda firma entre diferente partner di e cadena di husticia pa cual ta esencial e intercambio di informacion. Minister di Husticia Arthur Dowers ta splica cu shete aña pasa ora el a asumi responsabilidad pa e cartera di husticia el a realisa despues di combersa cu tur departamento, cu ta importante pa nan comparti informacion mas cu otro.
Minister Dowers a bisa cu e tabata sinti manera cu e ta un Fusion Center como cu tur informacion tabata yega cerca dje, pero e tabata sorprendi cu tabatin informacionnan importante cu ta bon pa cierto departamento tin cu nunca tabata yega na e departamento ey.
Realisando e necesidad pa un red pa comparti informacion pa traha y combati criminalidad mas eficientemente, el a inclui e establecimento di un centro di intercambio di informacion den su plan di maneho.
E partidonan envolvi a firma e establecimento di nan colaboracion den e prome Fusion Center den Reino riba 16 di November, y Minister Dowers a expresa cu e ta spera cu otro partnernan den Reino tambe por sigui e ehempel aki. E liderasgo pa cu establecimento di Fusion Center a cay bao di e Chef di RST (Recherchesamenwerkingsteam) Dhr. F. Moeharram , y e analistanan di Cuerpo di Polis di Aruba y RST a logra di pone ful e proceso riba papel.
Aunke algun di e departamentonan kisas ya tabata intercambia informacion, e acuerdo ta subraya e importancia pa permanentemente pasa informacion pa otro, el a agrega.
E mandatario a bisa cu falta pa traha un decreto pa completa e proceso di e establecimento di e organisacion.
Trahando hunto den Fusion Center por logra soluciona casonan mas lihe, y e por nifica tambe cu informacion cu ta existi cerca un partner pa kende e no ta completamente cla cerca nan dicon e informacion ta valioso, pero ora e data yega na otro organisacion nan ta realisa cu tin un cos mas grandi tumando luga.
“Nos pueblo ta bay bay bira mas “safe” door di e Fusion Center,” Minister Dowers a bisa. El a splica cu criminalnan cu kier logra nan metanan ta crea y disolve nan rednan hopi lihe. Ora nan logra y a comete e crimen, sea ta labamento di placa of otro fechoria, nan ta disolve e red hopi lihe. Nan ta traha sin barera legal, sin barera personal, ni ego, e unico interes cu e criminal tin ta e maximalisacion di e placa ilegal cu e ta gana.
Criminalnan ta opera hopi eficiente, y pa combati nan cu mas eficiencia a yega na e tratado cu ta provee pa e rednan di intercambio di informacion, cu ta mara na tratadonan di ley, pero ta yuda husticia pone tur cos riba un rij.
E cadena di husticia ta miho para cu shete aña pasa, segun Dowers, ainda tin cosnan pa drecha, y ta moviendo padilanti hunto y ta para asina mas fuerte contra crimen.