Tabatin hopi pregunta y tur a keda contesta; e sesion a bay bon, den un ambiente profesonal y a adresa preocupacionnan di tur partido. Esaki Minister mr drs Arthur Dowers a laga sa despues di tratamento di presupuesto di turismo pa 2017. Den su funcion como minister di turismo suplente siman pasa el a ocupa su mes cu e tarea aki, cual awo, despues cu a anuncia cu tin un minister di turismo nobo, e ta pasa pa su colega.
Minister Dowers a laga sa cu a adresa e preocupacion di parti di partido MEP encuanto di e cifranan di e cantidad di turistanan cu ta bin Aruba. E cifra aki a baha un poco, y segun splicacion di Aruba Tourism Authority, Minister Dowers a laga sa na Parlamento cu mester tene na cuenta cu tin factornan di influencia manera e cantidad di turista for di Venezuela cu a baha y ora tin un winter menos frieu tambe Aruba ta haya menos turista. Esaki ATA a bisa tambe den Ministerraad anteriormente.
Minister Dowers a bisa cu a pone tambe cuater miyon florin adicional como reserve pa haci uzo di dje si ta necesario, por ehempel si e winter ta bira hopi frieu no tin cu gasta e placa ey extra na mercadeo. Tambe el a splica ci mercadonan nobo na Merca cu ATA ta explorando y preparando pa habri, esaki tambe ta rekeri fondonan adicional pa mercadeo y incentivanan.
El a menciona cu por ehempel e vuelo di JetBlue for di Fort Lauderdale ta un di e desaroyonan cu Aruba mester sinta orguyoso di dje.
E mandatario a splica cu tambe a papia di e mercado di barconan crucero, cual ta mirando un aumento.
Minister Dowers a laga sa cu como minister di husticia e ta sintie sumamente orguyoso pa wak cu den un encuesta, cual a papia di dje durante di e presentacion di cifranan, a sali cu e factor cu ta score mas halto pa cu satisfaccion di e turista, ta “siguridad”. Hustamente esaki ta un punto cu su colega saliente, e ex-minister di turismo, hasta hunto cu oposicion, a critica masha, pero cifranan ta mustra cu e accionnan di husticia tin resultado.
E minister a comenta cu ta rekeri inversion den hobennan, den enseñansa y den sosten pa famianan pa logra mantene e siguridad. Den esaki por pensa riba e plan integral pa hubentud cu ta moviendo p’adilanti cune, despues cu e cuminsa e proceso den pasado hunto cu ex-minister di salud, Richard Visser y ex-minister di Asuntonan Social Michelle Hooyboer-Winklaar. E plan ta un bon plataforma y un forma integral pa trata cu hubentud, segun e mandatario.
Minister Dowers a confirma cu no tin kitamento di 10 miyon di presupuesto di turismo pa pone pa husticia como cu e presupuesto di turismo ya ta un di esunnan mas chikito y no lo tin espacio pa kita di e fondonan. Loke si ta pasando ta cu parlamento mes caba a aproba cinco miyon florin pa e presupuesto di otro aña pa bay pa husticia. Pero, e placa so no ta yuda preveni crimen.
Pa logra mantene e bon posicion di siguridad (y husticia) ta rekeri colaboracion entre tur ministerio, cual ta algo cu Minister Dowers ta mira cu si lo logra miho awo, y esaki lo resulta den mantencion y mehoracion di e posicion di Aruba.
Minister Dowers a splica cu a papia tambe tocante di e crecemento di cifranan di Aruba compara cu otro pais, unda cu por wak cu otro paisnan a crece relativamente mas. El a subraya cu mester tene cuenta cu e hecho ta keda cu ora compara e suma cu ta cobra na Aruba pa camber pa anochi y loke ta ricibi di cada turista ta mas cu otro paisnan den nos region. Asina mes, el a agrega, no por perde for di bista cu tin competencia.
Aruba ta keda un pais competitivo, Dowers a bisa, y Aruba ta ofrece un producto completo; esaki ta algo cu sigur ta duna Aruba un “edge” competitivo riba otro paisnan. No por keda trankilo y mester sigui cu e proceso cu a cuminsa ora cu e gobierno actual a tuma over, y sigui cu e enfasis riba realce di e calidad di turismo, segun Dowers.
A para keto tambe durante di e tratamento di e presupuesto na e ponencianan cu a gasta mucho hopi placa na factornan cu no ta mercadeo di turismo, y cu a gasta mucho placa den mercadeo compara cu antes y toch ta logrando e mesun resultadonan. Esakinan ta puntonan cu lo sigui discuti riba dje; y ta keda na e minister nobo pa lidera e cambionan cu cooperacion di full ministerraad.
Minister Dowers a conclui bisando cu hecho ta si cu for di 2006 por mira cu turismo a redobla y ATA y AHATA sigur ta merece e merito pa e logro aki.
El a bisa cu a palabra cu ATA cu otro siman nan lo duna minsterraad un presentacion, y ta habri cu esey e debate encuanto funcionamento di turismo.