Despues cu hopi a ser bisa den e caso di sr. Koolman kende a perde su bida na Colombia, minister Alex Schwengle ta sali splica mas riba e caso aki manera e cos ta. El a splica cu normalmente, mescos cu otro casonan, tin cierto casonan cu e minister no ta prefera di papia di nan publicamente. Pero una bes cu cierto personanan dicidi di haci algo publico, e ora e minister ta obliga pa sali dilanti. Esaki no ta pa defende su mes, pero bisa manera e cos a bay di banda di Gobierno. Ta bon pa hendenan sa e otro banda di e medaya.
Minister Schwengle ta haya cu e caso ta lamentabel di e meneer cu a fayece na Colombia y ta duel loke e famia ta pasa aden. E no tabata un trayectoria bunita pa e famia. E ta algo hopi doloroso ora algo asina pasa cubo y bo famia. E ta na altura perfectamente di e caso. E persona aki tabata su pashent antes. Djey su cuido a bay over na un colega di dje, na momento cu el a tuma su posicion como minister y su yiu di criansa ta traha cun’e. Tur dia e ta al tanto di e caso. Ta bon pa conta e cosnan pasobra un miembro di famia dicidi di door di su dolor kisas y den su emocion a conta su banda di medaya. Pero por bisa cu cierto partinan cu el a conta, absolutamente no ta berdad.
E minister a conta con Gobierno ta wak’e. E meneer aki tin un malesa lastimamente cu ta incurabel. A percura pa e haya diferente opinion. E trayectoria a cuminsa como pashent cerca e minister. Djey el a bay cerca su colega. Esey tabata su di dos opinion caba. A yega na e mesun conclusion. Djey a bin un profesor di Hulanda. A yega na e mesun conclusion. Djey a bay Hulanda, a yega na e mesun concusion. E meneer tabata tin un malesa cu lastimamente cu no por a cura. Tabata un malesa cu por wordo compara cu un cancer, y ta terminal.
Claro bo por magina cu ora bo ta jong bo ta haya un malesa asina aki y kier sigui biba y pesey el a dicidi di bay Colombia pa wak kico por saca afo pa cual aki minister ta splica kico ta e decision di e pashent.
Hopi di nos tin hopi gana di biba y ta dificil pa acepta un veredicto asina doloroso. Ta comprendibel tambe cu el a dicidi cu e ta bay toch Colombia atrobe pa un opinion, pa wak si acaso tin algo toch. Algo kisas apesar di tu e opinionnan, cu kisas toch tin algo otro. Ningun hende ta bisa cu no ta compronde cu el a bay Colombia pa e opinion ey . Unico cos ta si, cu e minister ta haya esaki riesgoso, door cu pulmonnan ta asina malo, pa bay biaha. Nan a bay Colombia, djey e persona a bira malo, a keda pega na Bogota y a supose di a bay Cali. El a end up den intensive care y djey el a fayece. Famianan a acerca Gobierno y AZV. Na momento cu AZV manda un pashent afo, den cualkier pais, pa un trato medico of pa un second opinion, cualkier consecuencia, AZv ta carg’e y pag’e. Si fayece den exterior, ta percura pa trece e persona bek. Vooral si ta malo y tin un malesa hopi severo, ta core hopi riesgo. Nifica cu mester ta prepara. Mester percura pa tin un bon seguro. Tin seguro cu ta boycott. Ora nan haya sa cu bo tin un malesa cronico, nan ta nenga di sigura. Tin di nan ta cobra masha hopi placa pa ora un hende bay afo.
Bo mester sa tur cos kico ora bo ta biaha bou di un enfermedad kico ta e risiconan cu bo ta core pa cual aki minister ta splica ki paso nan a tuma tambe den e caso aki ora a haya sa di dje.
Algo ta importante pa bay cu suficiente fondo. Pasobra ki pasa si bo mester haya problema den exterior, bo bira malo y drenta den Intensive Care.
E minister a menciona cu despues cu e pashent a bira malo, y a bay hospital, e no a ricibi e trato manera mester ta. E minister tin e hospital aden y no tabata tin miedo di menciona e nomber cual ta Enlativa de la 80 na Bogota. Nunca el a tende cu un hospital ta trata hende di estado aki. Gobierno sigur lo tuma pasonan via embahada Hulandes y tambe via Gobierno di Colombia, lo bay entrega un keho contra e hospital aki.
Na e momento cu e famia a acerca AZV, AZV tambe ta comunica cu e minister y tin comunicacion cu e famia. Na prome instante, no por haci nada, segun e minister. Como minister di salubridad, ta yuda ta via AZV, pero e ley di AZV ta prohibi e minister pa haci uzo di e ley aki pa casonan asina. E no ta gedekt huridicamente. Nifica cu si e minister firma, e mes lo end up ta paga tur cos y e no tin e cen pa haci esey.
A bay delibera, buscando con por yega pa yuda e famia. Via Sociale Zaken por a regla e asunto y asina e caminda a cana via Sociale Zaken, mientra tanto a tuma contacto cu Dienst Buitenlandse Betrekkingen. A tuma contacto directo tambe, pero tambe via DBB cu embahada. A schakel in embahada y tambe Gobierno Colombiano. A tuma contacto directo cu Cooperativa Internacional, cu ta un subafdeling di e minister di Salubridad di e Gobierno Colombiano y nan a duna ayudo.
E minister no ta compronde y ta lamenta, pasobra e ta keda un caso hopi lamentabel y doloroso pa e famia. Pero esey no ta duna ningun hende derecho di bay gaña si. Cu bo no ta contento cu e proceso a dura hopi, ta compronde esey. E minister a admiti cu e proceso a dura hopi, te na momento cu a yega na un solucion pa yuda e famia. E les siña cu no tin un protocol y no tin un draaiboek pa e casonan aki. A palabre cu prome minister y tambe cu minister Paul Croes, cu lo bay traha un protocol pa percura cu den futuro, na momento cu un ciudadano, cu ta su mesun culpa of no, Gobierno ta percura pa tin un protocol pa momento cu nan bati na Gobierno su porta, e proceso por cana un tiki mas lihe. Tin cu zorg pa cana un caminda legal si. Si no haci esaki, ta cometiendo un acto ilegal.