E programa Biba Amor, cu ya tin algun aña dunando resultadonan positivo na Corsou, a wordo adapta pa Aruba y ta den su fase di proyecto piloto na diferente scol. Diaranson atardi a tuma luga un reunion pa entrega un DVD di e programa na partnernan cu a haci e proyecto aki posibel, incluyendo e organisacion partner di Corsou, Wit Gele Kruis, Aruba way, UNESCO y e directiva di scol SKOA. A introduci e material aki on line riba w website di WGK unda cu mayornan por yega facil na dje pa informa y educa nan mes. Siguientemente un rapport riba resultadonan di e scolnan piloto lo wordo entrega na minister di salud den luna di Juni proximo.
Minister Salud, dr. Alex Schwengle a laga sa cu e proyecto ta uno sumamente importante pa desaroyo sano di e comunidad pa loke ta trata specificamente prevencion di malesanan cu ta keda transmiti sexualmente y prevencion di embaraso hubenil.
El a splica cu si mira e cifranan di paisnan cu ta entre esunnan mas liberal, y pues habri pa combersacionnan tocante di cuido personal, y sexualidad, manera Hulanda, e cifranan di embaraso hubenil y malesanan transmiti sexualmente ta hopi abao.
Proyectonan manera “Biba Amor” ta un inversion pa futuro y ta tuma tempo pa e frutonan mustra, segun e mandatario. Loke si ta wordo evalua awo, for di e “nulmeting” padilanti, esta for di momento cu a cuminsa cu introduccion di e programa te cu su prome evaluacion, entre otro ta e conscientisacion di e muchanan pa cu e cuido y proteccion di nan curpa, con nan mes ta bisa di ta anda cu nan curpa pa cu higiena, y nan proceso di tuma decision pa cu asuntonan cu tin di haci cu e proteccion y cuido di nan curpa.
Lo pone e “nulmeting” banda di e resultadonan di e evaluacion y conclui si mester adapta e programa y kico lo mester adapta.
Pharetza Bertad-Damon, kende ta coordinado y docente di e programa “Biba Amor” di Corsou, ta asistiendo Aruba den e introduccion di e programa.
El a agrega cu a logra algo hopi importante diaranson cu e introduccion tambe di e pagina web riba e website di WGK pa mayornan. Esaki ta e forma pa yega mas cerca di mayornan, kende ta pa nan yiunan e pilarnan di educacion, y di educacion sexual saludabel. E plataforma online ta yuda e organisadonan di e programa yega mas cerca di e mayornan cu informacion valioso cu ta yuda nan crea lasonan di confiansa cu nan yiunan pa nan por yuda e muchanan den un desaroyo sexual saludabel.
Pharetza ta subraya cu comunicacion saludabel entre e mayor y su yiu ta esencial, y cu e programa no ta dirigi na actividad sexual, of e acto, pero ta guia e mucha den e proceso di descubri y identifica ken e ta en realidad, kico ta e diferente emocionnan cu e ta sinti, e ta un guia pa yuda e mucha tuma decisionnan cu ta bon pe mes, y cu ta perfectamente apropia y bon pa e bisa “no” na cualkier presion of sugerencia pa participa na actonan sexual of otro conducta cu e no ta desea di participa na dje.
Pharetza ta agrega cu mester realisa cu tecnologia ta pone tur informacion den e mucha su man pa medio di su telefon, y no ta manera antes cu mester sconde cu un revista of buki den boekhandel of na cas pa wak porno. Ta importante pa e mucha, e hoben, wordo haci consciente cu loke e ta wak riba internet no ta refleha realidad di bida, y no tin respet pa e ser humano den dje.
Rond mundo a yega tempo pa hendenan tuma nan responsabilidad como mayor y duna nos yiunan e guia y educacion sexual pa asina nan tuma decisionnan sexual conscientemente, el a conclui bisando. E ser humano tin un curpa so, y e tin cu cuid’e.
Minister dr. Alex Schwengle a splica tambe cu e inversion den educacion ta sumamente importante, y tin cu inverti mas den educacion. E inversion aki no ta placa so, pero e ta den habilidad y conocemento, e ta inversion den recursonan humano cu ta wordo transmiti den e pueblo, el a subraya. Minister Schwengle a gradici Aruba Way, SKOA, y UNESCO partnernan di WGK den e bunita proyecto aki
Cu e inversion den e programa aki ta spera di mira resultadonan positivo, unda cu cifranan di malesanan transmiti sexualmente y embaraso hubenil lo keda reduci na Aruba.