Riba Dia di Betico tabatin diferente evento rond di nos isla celebrando y honrando Betico Croes. Un di e eventonan cu den e ultimo añanan a crece inmensamente ta e Betico Loop cu ta tuma luga tur aña den curason di Santa Cruz. Minister di Salud Publico, Cuido di nos Grandinan y Deporte, dr. Alex Schwengle un biaha mas no e perde pa gana y a uni su mes na e mas di 800 participantenan asina demostrando su agilidad deportivo.
“Pa cuminsa mi kier felicita pueblo cu Dia di Betico. Mi ta spera cu e ta un dia bunita y mas ainda pa e hendenan celebr’e na un manera bunita y pa evita cosnan negativo”, asina e mandatario a expresa na su yegada na e meta final. E mandatario ta contento cu e participacion di e atleta y aficionado nan “Mi ta kere cu si a habri’e pa 1000 hende mes lo nos a yen’e. Mi ta asina contento pa mira cu Aruba ta moviendo y cada aña mas. Mi tin cu bisa cu Betico Loop ta un reto grandi pasobra cu e tin hopi subida cu bahada. E tabata un reto basta bon danki pa’mi tambe”.
E mandatario di deporte a sigui splica cu tabatin diferente ruta… “un di 6 km y uno di 10 km. E biaha aki por a mira mas participante femenino. Mi ta felicita nos hende muhenan y mi ta spera cu nan sigui pusha deporte. Mama, Tata cu nan yiunan famianan completo a participa tambe y e ta bon pa sigui stimula e proximo generacion pa haci deporte.”