CARACAS, Venezuela (AP) — Venezuela y Rusia lo realisa maniobranan aereo combina como parti di e cooperacion estrecho den e area militar cu ambos pais ta mantene. Esaki ta inclui compra miyonario di armanan, e autoridadnan Venezolano a informa dialuna.
Den un acto na aeropuerto internacional Simon Bolivar di Maiquetia, e minister di e Defensa, general en hefe Vladimir Padrino Lopez, y e resto di e alto mando militar a duna bon bini na miembronan di e forsa aereo Ruso cu ta participa den vuelonan operativo combina cu oficialnan Venezolano.
“Niun hende mester tene miedo pa e presencia di avionnan logistico cu a pisa teritorio Venezolano. Nos ta constructornan di pas”, Padrino Lopez a bisa na medionan estatal ora cu el a defende e operacionnan cu a sigura cu nan ta buscando manera pa prepara Venezuela pa defende su mes.
E yegada di e delegacion Ruso ta bin un poco despues di un bishita sorpresa cu e mandatario Venezolano, Nicolas Maduro a haci na Moscu, unda el a reuni cu su homologo Ruso, Vladimir Putin.
Venezuela a cumpra Rusia mas di 4 biyon dollar na arma desde 2005, incluyendo helicopter y 100 mil fusil Kalashnikov.
Na september ultimo autoridadnan militar a delanta cu Rusia lo incorpora su mes na algun operacion special pa duna apoyo na e educacion di e forsa aereo di e pais Suramericano.
E mobilisacion di militarnan a wordo critica pa e vicepresidente Mericano Mike Pence cu a considera e accion como un esfuerso di “intimidacion” y el a adverti e gobierno di Nicolas Maduro cu “lo ta bon pa e no pone e determinacion (di Washington) na prueba”. El a reitera cu nan semper lo para banda di nan aliadonan.
E asina yama ” Operacion Strategico Combina Integral” ta coincidi cu e resurgimento di versionnan di un posibel intervencion militar stranhero na Venezuela, accion cu autoridadnan Mericano a descarta na mas di un ocasion.