TAMAULIPAS, Mexico – Militarnan Mexicano a rescata 34 Centroamericano, entre cual 15 menor, cu tabata den un cas den e estado di Tamaulipas, na frontera cu Merca, segun e agencia AFP a informa.
Den e cas unda cu a bin haya e migrantenan, polis a haya tameb 4 vehiculo, 3 arma largo, charger y cartucho, segun e gobierno regional a informa, sin duna mas informacion si tabata trata aki di e migrantenan cu a wordo intercepta pa hombernan arma riba un caminda diahuebs ultimo.
“Di e total di 34 persona rescata, tin 8 Guatemaltecos, 25 Hondureño y un Salvadoreño”. No tabata tin ningun detencion den e operativo “ya cu e personanan cu tabata vigila e migrantenan a huy ora cu nan a ripara e presencia di e personal militar”, gobierno di Tamaulipas a reseña.
E hayasgo ta bin algun dia despeus di cu’n grupo di hombernan arma a secuestra 19 homber cu tabata biahando den un bus den e mesun estado aki.
Presidente di Mexico, Andrés Manuel Lopez Obrador, diamars a confirma cu e secuestradonan ta migrantenan.
Segun Ministerio Publico di Tamaulipas, e secuestro a tuma luga ora cu e bus tabata pasando door di San Fernando, un di e camindanan mas peligroso di e estado. Na augustus 2010, 72 migrante a wordo secuestra y asesina, den nan mayoria Centroamericano, cu tabata biahando di manera clandestino pa Merca, un masacre cu ta wordo atribui na e cartel di Los Zetas, cu supuestamente a purba recluta nan di manera forsoso.
E caso ta suma na otro caso registra na februari, ora cu un grupo di 25 persona a desaparece ora cu nan tambe tabata biahando den autobus door di e estado aki.
Rescate di gruponan di migrante cu ta biaha scondi den containernan of ta reclui den casnan particular ta escena comun na Mexico, cu ta comparti mas di 3 mil km di frontera cu Merca.