CARACAS, Venezuela- Un grupo di militarnan cu supuestamente lo a rebeldia contra di e gobierno Venezolano, e gobierno di presidente Nicolas Maduro, “a entrega nan mas y a wordo deteni”, segun Fuerza Armada Nacional Bolivariana informa. Nan a priminti di aplica tur e peso di ley.
Segun e version oficial, e insurgentenan tabata forma parti di un grupo “chikito” di militarnan di e Guardia Nacional Bolivariana. Nan ta wordo acusa di a horta un cargamento di arma di guera den oranan di marduga di dialuna y di a secuestra cuater agente policial bou menasa di morto .
E rebeldenan aki, un bes mas, segun e version oficial, a dirigi nan mes pa un cuartel di e Guardia Nacional den e bario Caraqueño di Cotiza, unda cu nan a haya “resistencia fuerte” di parti di otro agentenan y unda cu na momento di nan detencion, tabata tin e armanan horta den nan poder.
E informe oficial ta sigui bisa cu “e rebeldenan ta dunando informacion di interes na e organismonan di inteligencia na e sistema hudicial militar”, mientras cu e otro cuartel y sedenan militar, “ta funcionando bou normalidad completo y absoluto”.
E Fuerza Armada ta rechasa categoricamente e tipo di actonan aki, cu seguramente ta wordo motiva pa interesnan oscuro di extrema derecha y cu ta contra di e normanan elemental di disciplina militar”, segun e comunicado difundi ariba e red social Twitter pa e minister di Defensa, Vladimir Padrino Lopez.
Parlamento Venezolano, den su gran mayoria opositor, y varios pais no ta reconoce e legitimidad di Maduro cu e luna aki a huramenta su di dos mandato cu lo mantene na poder te cu 2025. Na mei ultimo Maduro a wordo reeligi den un eleccion señala di tabata uno fraudulento y den cual no tabata tin participacion di oposicion, e.o. pa motibo di cu e principal dirigentenan a wordo prohibi di postula nan mes pa un cargo politico.
E diputado opositor Julio Borges, ex presidente di Parlamento Venezolano y cu ta wordo considera profugo di husticia Venezolano, a sigura ariba un mensahe di Twitter cu “e mesun descontento y deseo di cambio ta loke a motiva e rebelion di Guardia Nacional na Cotiza y cu ta existi den henter e Fuerza Armada”.