Milieustraat ta un proyecto di Serlimar S G den colaboracion cu Aruba Tourism Authority
En conexion cu celebracion di temporada di fin di aña, e ta un tradicion cu Serlimar Sui Generis conhuntamente cu e aporte di Aruba Tourism Authority, A.T.A., ta organisa e ultimo Milieustraat di aña. Manera tradicion Milieustraat 2018 a cuminsa den luna di November y lo termina den luna di December y a pasa den area di Noord, Playa Pabou y Dakota. E siguiente fechanan di Milieustraat 2018 lo ta:
- 2 – December – 2018: ex. Lucky Store, San Nicolas
- 8 – December – 2018: Centro Deportivo Betico Croes, Santa Cruz
- 9 – December – 2018: Centro Deportivo Rooi Afo, Paradera
- 16 – December – 2018: Veld Universal, Pos Chiquito – Savaneta
Na cada fecha lo bai tin 4 container di Serlimar S G disponibel entre 7’or di mainta te cu 1.45pm di atardi. Tur habitante di bario y bisindario por haci uzo di e oportunidad aki pa benta articulo di cas, sushi di cura of otro tipo di desperdicio afo den e container nan disponibel. Ploeg di Mantencion Bo Bario lo tey presente pa asisti habitante nan cu mester ayudo pa transporta nan desperdicio cu kier deshaci di djie. Pa ricibi e ayudo di Mantencion Bo Bario pa recoge desperdicio pa tira afo por yama 5245080 di dialuna pa diabierna pa registra e adres pa e dia di limpieza.
Serlimar S G kier pa e comunidad di Aruba marca e fechanan aki pa asina no perde e oportunidad pa deshaci di desperdicio na cas y asina cumpli cu e tradicion di limpieza pa e temporada di fin di aña. Serlimar S G ta sumamente contento cu e colaboracion di parti di A.T.A. cu ta haci cu e accion di limpieza grandi pa fin di aña posibel. A.T.A. hunto cu e proyecto di Ban Serio ta enfatisa cu nos tur ta aporta y sigur mester reconoce nos impacto nos por tin ariba Aruba.