CUCUTA, Colombia- Director di Migracion Colombia, Christian Krüger, a informa cu e entrada y salida di Venezolanonan pa Colombia a aumenta cu 5% dialuna, 24 di Juli. Dialuna tabata un dia liber na Venezuela, caminda ta recorda e natalicio di e libertador Simon Bolivar.
“Esaki ta un migracion di transito, e entrada di ciudadanonan Venezolano a aumenta dialuna debi na un dia liber na Venezuela. Ciudadanonan Venezolano a probecha e dia festivo na nan pais pa bay Colombia pa cumpra cuminda”, Krüger a indica.
Ela bisa tambe cu mas di 26 mil Venezolano a sali di e pais dialuna via e Puente Internacional Simón Bolívar. “Hopi Colombiano cu mas di tres decada atras a emigra pa Venezuela, ta regresando nan pais. Den e ultimo añanan, e ingreso total di Venezolanonan ta yegando 300 mil persona”, el a splica.
El a afirma cu despues di e anuncio di welga na Venezuela pa protesta contra di e Constituyente, e porcentahe di Venezolanonan cu ta yega Colombia pa keda a aumenta levemente y mayoria di esunnan cu a drenta ta bin pa haci compras di articulonan basico y ta regresa nan pais bek”.
Segun Cristian Krüger, director di Migracion Colombia, e welga na Venezuela ta un di e razonnan pa cual e fluho di Venezolano a subi. E ansha pa haya cuminda ta un di e motibonan pa cual hopi Venezolano ta bin Colombia. E poblacion sa cu e frontera ta cera ora cu tin votamento y p’esey e hendenan ta cumpra nan cuminda.
Fuente: http://www.panorama.com.ve