Al menos shete persona a muri dialuna na aeropuerto di Kabul, capital di Afganistan, memey di escenanan di caos y desesperacion mientras cu miles di persona ta busca pa alcansa un luga den e vuelonan pa huy di e pais y scapa di e Talibannan.
Desde diadomingo, ora cu e capital Afgano a cay den mannan di e grupo islamista radical casi sin Resistencia, e instalacionnan di aeropuerto a yena di persona, tanto diplomatico y contratistanan como civilnan Afgano, kendenan ta busca pa scapa pa miedo di represalia.
Hopi embahada a uza aeropuert pa duna visanan di emergencia, aunke e proceso cu ta tarda combina cu e poco vuelonan disponibel a conduci na un aglomeracion rapido na e unico aeropuerto den operacion na henter e pais.
Miles di persona cu a aglomera dilanti di e terminalnan y algun incluso hasta a bula e murayanan y e baricada, a subi pista y a trata di subi e avionnan cu ta bay lanta vuelo.
Pentagino a confirma cu su forsanan militar a mata dos homber kendenan, segun a wordo bisa, tabata arma, mientras cu otro cinco parce a perde nan bida bou di circunstancianan no mucho cla, probablemente ora cu nan a trata di subi e avionnan den pleno despegue.
Segun e informenan, e forsanan Mericano a los tiro den aire pa plama e personanan cu tabata trata di subi e avionnan cu forsa.
Vocero di Pentagono, John Kirby, a bisa cu e forsanan di su pais “ta trahando pa restablece e siguridad” y nan ta spera pa reanuda operacionnan aereo “den e proximo oranan”.
Gobierno di Merca a anuncia dialuna cu nan a yega na un acuerdo cu Taliban pa permiti salida di e pais di Mericanonan sin problema y a menasa di tuma accionnan militar si stroba e operacionnan di rescate.
No obstante, version di e canal Mericano, e situacion na aeropuerto internacional ta asina “tenso” cu funcionarionan di Merca ta considerando evacua tur su ciudadanonan y laga Afganonan atras.