CARACAS, Venezuela – E tension na Venezuela ya ta pasando di ta parti di e cotidianidad. Oposicion a bay bek caya pa di tres biaha den un siman y a protagonisa un manifestacion caminda cu a produci enfrentamentonan entre polis y manifestante. E agentenan a manda gasnan lagrimogeno pa evita cu e concentracion yega te na e sede di e Defensoria di Pueblo.
E protesta a tuma luga cu mas argumento cu loke a wordo convoca, despues cu a conoce cu Gobernador, Henrique Capriles Radonski no por ocupa cargonan publico durante e proximo 15 añanan, segun un dictamen di Contraloria General di e Republica devela diabierna. Tabata e propio Capriles, e lider di e oleada di protesta, cu a cuminsa 10 dia pasa y e encargado di dirigi e manifestantenan pa e sede di e Defensoria di Pueblo den centro di Caracas. Tabata un decision sorpresivo, pero no casual. E Defensoria di Pueblo ta parti di e Conseho Moral Republicano, un instancia cu a nenga di cualifica como grave e actuacion di e magistradonan cu a avala dos sentencia cu tabata usurpa e funcionnan di Parlamento. Tabata e paso prome pa tramita den Parlamento su remocion.
Polis Nacional Bolivariano a intercepta e cabes di e marcha ora cu nan tabata transita den e avenida Libertador. E fuerte represion cu gasnan lagrimogeno y disparo di proyectilnan di rubber, a dispersa e manifestantenan, pero otronan a persisti den sigui te na nan destino. Algun a tuma vianan alterno y tabata tira piedra na funcionarionan. E caminda a keda completamente cera pa transito di auto. Ta trata aki di e mesun “toma y dame” cu a mantene a lo largo di e siman y cu menasa pa converti den un careda di largo aliento, apesar di e yegada di vakantie di Semana Santa. Te na e momento no a reporta ningun herido of victima.
E fuerte represion di e dianan pasa, cu incluso a provoca morto di un manifestante den un poblacion cerca di Caracas, a haci cu Amnesty International a condena den un comunicado e uzo excesivo di forza contra manifestantenan y recorda cu ta obligacion di e Estado “garantisa e derecho na libertad di expresion y manifesta pacificamente.” “Na luga di uza recursonan pa empecinadamente persigui y reprimi esnan cu ta opina distinto, Gobierno di Venezuela mester ta concentrando su esfuersonan den soluciona e crisis humanitario cu ta empeora dia pa dia,” Erika Rojas, directora pa las Americas di e organisacion, a agrega.
E insistencia di oposicion di keda riba caya ta busca pa kibra e apoyo interno cu e regimen di Maduro tin. Cu e comunidad internacional practicamente en contra, e lidernan di Mesa de la Unidad, ta aspira pa haya un compromiso concreto den nan plan pa kibra e omnimodo poder cu Chavismo ta ostenta.
Aunke cu ya no tin e apoyo popular di pasado, e regimen parce di ta dispuesto pa no dal marcha atras den su esfuerso pa keda den cualkier costo na poder. Den e plan aki parce di ta inscribi e decision di inhabilita Capriles y sak’e for di politica. Si e sancion ta confirma e gobernador di e estado di Miranda (centro norte di Venezuela) lo por bolbe aspira na cargo di representacion popular recien na edad di 60 aña. E lider opositor a descarta e posibilidad ey. “Maduro no lo bay retirami di politica. Solamente e pueblo di Venezuela lo retirami,” el a afirma den un acto cu a tuma luga diabierna na Caracas.
E medida ta reconfigura e panorama di oposicion y ta yena di duda e eleccion di e candidato unitario cu Chavismo den e eleccionnan presidencial di e ultimo trimester di 2018. E careda no a cuminsa, pero ya nan a cuminsa na asoma na algun aspiracion. Cu Capriles inhabilita y Leopoldo Lopez cera, e opcionnan restante cu posibilidadnan ta liderasgonan debil y discuti, cu ta insisti den reconciliacion y e acuerdo nacional como puntonan medular di su oferta. Por tanto, e escenario mas faborabel lo ta cu e Gobierno entrega e poder na final di 2018, como ta coresponde.
E regimen parce ta diseñando un oposicion a la carta. Obliga pa e condena internacional cu a supone e autogolpi promovi pa e Tribunal Supremo di Husticia y e calamitoso estado di economia, e Gobierno parce ta impedi na sigui posponiendo e fecha di eleccionnan na gobernador y na retrasa cu argucianan legal di e comicionan presidencial. E siman aki Maduro a reconoce cu na 2018 lo bay tin eleccion na Venezuela.
Fuente: http://elpais.com/