No mucho tempo pasa varios famia a haya nan den gasto adicional durante vakantie pa via di e mal maneho di minister di Husticia, mr. Arthur Dowers, ya cu e rijbewijs blanco cu tabata wordo emiti temporalmente bou su responsabilidad no tabata wordo reconoci den exterior pa huur of core auto.
Awo a bin resulta cu e rijbewijsnan cu a wordo emiti desde 2015 bou su responsabilidad como minister tampoco a wordo traha conforme ley y rekisitonan di siguridad! Como 1500 rijbewijs pa e motibo aki no ta wordo consdera valido pa vota paso e datonan capta riba e rijbewijs no ta cuadra cu e informacion oficial na Censo. Pues atrobe miles di ciudadano ta wordo afecta door di e mal maneho di e minister di Husticia actual.
E hecho e rijbewijsnan menciona tin datonan robes riba nan ta pone cu e determinacion di identidad corecto di un persona ta wordo dificulta y e confiansa den rijbewijsnan oficial emiti door di pais Aruba ta wordo afecta severamente. E responsabilidad pa traha y emiti documentonan di identificacion ta algo hopi serio ya cu ta documentonan cu tambe ta wordo uza internacionalmente y mester cumpli cu rekisitonan di siguridad.
Na Hulanda dos mandatario mester a tuma nan retiro den un caso similar conoci como e “Paspoortaffaire”. Aki na Aruba so ministernan di AVP ta keda pega barco y e fraccion di AVP ta keda bati man comosifuera nada no a pasa. Pesey dia 22 di September venidero Pueblo lo por huzga pa su mes e mal maneho di e Gobierno actual y trece un cambio cu e derecho di voto.
Andin Bikker:“Nos di POR, Plataforma E Forsa Nobo, ta cla pa trece cambio positivo den Gobernacion di Aruba, cu sosten masal di Pueblo esey Mester POR!”.