E centronan sindical y e organisacionnan social di Argentina a protesta awe na ciudad di Buenos Aires contra un ‘megadecreto’ impulsa p’e gobierno di e presidente Javier Milei.
E convocatorio a wordo encabesa p’e Confederacion General del Trabajo (CGT), cu ta reuni e mayor sindicatonan di e pais, na cual nan a join e Central de Trabajadores Argentinos (CTA y CTA Autonoma) y otro agrupacion politico y social.
Durante merdia, miles di persona a reuni riba Plaza Lavalle, dilanti di e edificio di corte. Eynan e dirigentenan di CGT a entrega un documento na husticia pa pidi anulacion di e decreto di Milei, cu ta deroga mas di 300 ley y ta avansa riba e derechonan laboral.
SIN INCIDENTE
E mobilisacion, na cual a participa miles di persona, a pone un biaha mas e protocol “antipiquete” lansa p’e minister di Siguridad, Patricia Bullrich na prueba, cu e obhetivo di libera e cayanan di corte.
A pesar di un amplio despliege cu a conta cu e participacion di e cuater forsanan federal – Polis Federal, Gendarmeria Nacional, Prefectura Naval y Polis di Siguridad Aeroportuario (PSA) – transito den cercania di e Palacio de Justicia, caminda cu Corte Supremo di Husticia di e Nacion (CSJN) ta ubica, a wordo blokia.
Sinembargo, no a registra incidente ni detenido.
E lidernan di CGT a realisa un acto caminda cu nan a lesa un documento dirigi n’e mandatario Milei, bao di e titulo “Somos los Trabajadores, no somos ‘la casta’”, La Nacion a reporta.
E texto a señala cu e decreto presidencial ta contene “hopi medida arbitrario, anticonstitucional y un cantidad grandi di derecho civil, comercial y social ta den desbentaha,” fuera cu a introduci un “reforma laboral regresivo feroz cual unico obhetivo ta disciplina e trahadonan, limita e actividad sindical y solamente privilegia interes empresarial.”
Protesta masivo
Fuera di CGT y CTA, Union de Trabajadores y Trabajadoras de la Economia Popular (UTEP) y e Asociacion di Trahado di Estado (ATE) a participa, cu ya a denuncia 7 mil retiro door di e decreto di e presidente den e areanan publico.
Tambe a join algun agrupacion di iskierda manera Frente de Organizaciones en Lucha (FOL), aunke e sectornan aki a hacie cu e intencion adicional pa exigi e centralnan obrero pa yama un welga general.
CGT a convoca su Comite Central Confederal (e maximo organo deliberativo y ehecutivo) p’e diahuebs 28 di december, pa analisa e tema, pero te asina leu no a wordo confirma cu medida di paro.
E dirigentenan di CGT a dicidi diahuebs ultimo pa realisa e marcha aki pa entrega nan manifiesto na DNU. Segun e gremio y e organismonan di derecho humano ta denuncia, e decreto di e mandatario, cu ta aplica mas di 300 ley pa desregula e economia, ta inconstitucional. Es mas, ya nan ta enfrenta un bataya legal na Husticia p’e presentacion di diferente discrepancia. Un di nan ta e propio Confederacion General del Trabajo y a word rechasa diaranson p’e hues nacional di trabao, Ignacio Ramonet, debi cu e decreto ainda no ta den vigencia, Telam a informa.
Fuera di esey, presidente Javier Milei lo manda diaranson na Congreso un serie di proyecto den un ley ‘omnibus’, cu ta establece un serie di reforma den materia tributario, electoral, laboral, penal y energetico, e vocero di Casa Rosada, manuel Adorni, a confirma durante un rueda di prensa.