Diabierna despues cu e resultado di eleccion a bira conoci, lider di partido AVP a dirigi su mes na su simpatisantenan. Partido AVP bay atras cu casi 20 mil voto, y segun lider di partido di AVP, pueblo a papia bon cla.
Partido AVP ta keda e partido mas grandi, pero e pueblo a papia bon cla. Un partido cu a bay di 13 asiento pa 9 asiento, ta un partido cu mester saca su conclusion. Y nan a saca nan conclusion, cu pa 4 aña pueblo a duna AVP e confiansa pa sigui 4 aña mas. Pero durante e ultimo temponan, conflictonan interno, casonan andando a afecta e partido sigur.
Durante e periodo di traha lista, el a considera cu e no tabata traha un lista pa gana un eleccion, pero un lista pa prepara AVP pa un siguiente generacion. E lo sede su asiento na un hoben cu lo drenta Parlamento, pa duna e hobennan un oportunidad. AVP nunca a keda pega na liderazgo te ora cu partido a perde tur cos, semper el a innova su mes. Y ta yega momento cu e lider mes crea espacio pa innovacion y renobacion den e partido.
Riba lista di AVP y pafo di AVP tin personanan prometedor cu por lidera e partido. Mike Eman lo ta cla pa dirigi e hobennan pa sigui traha pa hiba e partido padilanti. AVP ta asumi su responsabilidad di bay den oposicion, pero sin Mike Eman. E lo crea espacio pa un lider nobo pa e partido. E partido tin asina hopi potencial, y ta entrega e liderazgo na un persona hoben.
Segun Sr. Mike Eman, democracia ta haya su balor real na momento cu esunnan eligi realisa e balor di kico ta e expresion di e pueblo. Un partido cu a bay atras den voto, ta un partido cu tin cu asumi su responsabilidad di renobacion y reflexion pa por prepara e partido pa sigui asumi e responsabilidad den e pais aki.
Partido AVP ta e partido di mas bieu na Aruba. E ta un instituto cu tin su rol, tin biaha den gobierno y tin biaha den parlamento. Su rol ta uno transcendental. Segun Sr. Mike Eman, e ta un decision hopi personal y segun su consenshi, aunke por ta uno hopi radical pero tambe hopi personal. Partido AVP cada momento den su historia ta skucha di e pueblo. E ta balora y e ta skucha di su pueblo.
Lider di partido di AVP no ta duda cu lo bin un coalicion. AVP ta simplemente un instituto cu a perde parti di su confiansa cu e ta balora. E ta balora e stimacion di e pueblo. AVP no ta un partido dirigi ariba poder, nan tey pa siribi e pais.
Na ultimo, e ta tuma e decision di retira pero AVP ta den su sanger. E lo keda pa AVP y el a traha un lista, un ekipo di relevo. E renobacion tin su merito, y tambe cu e lo nenga e posicion di formador pa e gobierno nobo, segun Sr. Mike Eman, lider di partido di pueblo Arubano, AVP.