Miguel Mansur Jr.: No tin peor ciego, cu esun cu no kier mira

Prome Ministro su mesun cifranan di un contraccion di 1/3 parti di nos economia e aña aki y 1.1 biyon adicional den debe na 2020 lo resulta den un debt/gdp ratio di 122%. Inclui e obligacion financiero di PPP den nos debe y e debt/gdp ratio ta pasa 150% pa fin di e aña aki!

Apesar di un debe impagabel, un gobierno cu ta gaba su mes di ta financieramente responsabel a dicidi di bai fia placa di inversionista pa cubri su gasto nan a corto plaso pa e proximo 1-2 luna. E logica ta cu ta placa cu lo mester a fia toch pasobra Hulanda kier pa placa cu tabata destina pa tres luna cubri cinco luna.

Atrobe Hulanda a sorprende Aruba cu un cambio desagradable. Well kisas e disparate nan den su partido cu a bai keha Reino Hulandes na COPPPAL y United Nations sin NINGUN probabilidad di exito tambe lo tabata un sorpresa desagradable. Especialmente ora un pais cu ta den crisis nan mes ta ofreciendo bo prestamo sin interes pa dos aña.

PM no a specifica na ki interes of ki termino e inversionista nan ta ofreciendo Aruba placa. Cu un rating di BB di Fitch cu negative outlook y BBB+ cu negative outlook di Standard & Poor’s ta improbable cu Aruba lo por bai financia tur e placa cu e mester arriba mercado internacional. Cu un debt/GDP ratio premira pa pasa 120% e aña aki ta casi imposible logra un nivel di interes bao di 6% y sigur lo ta mas cerca di 8% cu no ta mas.

Esei ta nifica 60-80 miyon mas den gasto di interes so pa aña ariba un prestamo di 1 biyon florin cu ta mas o menos e suma cu Aruba mester e aña aki. Comerciante Uni e siman aki a corectamente describi cu ta facil pa gobierno gaba cu un surplus prome cu COVID-19, mientras nan a hisa tur sorto di impuesto pa tapa buraco. Ta mas dificil splica con un gobierno cu tin pueblo di Aruba su interes na pecho (cu ta pone e hende “central”) por hustifica gasta 60-80 miyon mas na interes pa aña den un crisis. Esei ta mas o menos dobel e suma di 35 miyon cu PM a indica Hulanda kier pa nan corta den cuido medico.

Kier men no por corta 35 miyon florin di cuido medico pero si por gasta 60-80 miyon na pago nan di interes adicional pa gobierno sigui tapa buraco, desvia atencion y busca union dentro di partido?

Manera a bira custumber rond di eleccion e ultimo aña nan atrobe tin promesa cu refineria ta bai habri. Si claro e mesun refineria cu nos tur por mira ta tur frustia y cayendo den otro y compañia tras compañia a abondona awor den porta di eleccion ta bai habri? Na un momento cu tin sobrecapacidad den mercado di petroleo un inversionista ta bin inverti 5-15 biyon dollar pa reconstrui e refineria mientras ningun feasibility study creible por ilustra e caso economico faborabel?

Sigur tin hopi interesado den e storage y transshipment capacity especialmente awor cu prijs di petroleo ta abao. Mi propio conocimento ta permitimi expresa cu certeza cu tin algun cu otro propuesta caminda ta priminti cielo y tera. Nan ta bai renova e refineria cu tur cos top, pero manera tur otro nan ta haci promesa basa arriba un technical due diligence cu ta bin despues pa nan purba hanja acceso na e storage y transshipment capacity awor.

Mi a tende PM gaba cu e oportunidad nan di cannabis medicinal como un pilar economico prometedor. Sigur tin argumento pa legalizacion di cannabis pero presenta esei como un posibel pilar economico ta desingenuio. Brasil p.e. tabata e 15 exportador mas grandi di cannabis medicinal na 2019 y su export nan tabata tin un valor total $29.7 miyon. Con Aruba, sin un fuente di awa dushi natural por bai competi cu poder nan agricultural? Te hasta si nos surpasa Brasil un pais di 209 miyon y tera fertil pa sobra, $30 miyon no ta cubri ni un luna di gasto di gobierno dus mi no por compronde con bo por honestamente pinta esei como un posibel pilar economico nobo.

Malinforma pueblo pa conveniencia politica, duna hende nan preocupa y te hasta desespera speranza falso mientras bo gobierno ta sigui tover cu nos futuro ta inhustificable. Manera e carta di AHATA, ATIA y KvK a ilustra, Aruba tin dos opcion 1) Firma cu Hulanda 2) Derumba nos pais te cu Hulanda lo mester tuma over a base humanitario. Ohala cu no tabata asina pero e mal maneho di nos pais durante e ultimo 20 aña nan a laga nos sin un salbabida pa e crisis actual. Mas bien nos a hoga caba y awor nos spirito ta nengando resucitacion paso e ta trapa arriba nos autonomia.

Gobierno por sigui coba pero e dos salida nan ta keda mescos y nos Prome Ministro ta mas cu suficientemente capaz pa compronde esei. Ta ora pa cuminsa pone e interes general prome, apesar di e consecuencia nan pa partido.

Miguel Mansur Jr.

N.B. Na momento di publicacion di e articulo aki, su autor falta informacion di dos dato sumamente importante cu lo por wordo categorisa como TRANSPARENCIA:
Ken ta e inversionista financiado?
Bou di ki condicion(nan) GOA a bin na remarke pa dicho prestamo?

Comments

comments