TIJUANA, Mexico – Un grupo di migrante di e caravana di Centroamericanonan radica na Tijuana, Mexico diadomingo a desafia autoridadnan ora cu nan a bula e muraya fronteriso cu Merca den nan ansia di crusa y pidi asilo, pero nan a wordo ricibi cu gasnan lacrimogeno pa polisnan fronterisa Mericano.
Diadoming a cuminsa cu’n marcha aparentemente pacifico di e shelter “Benito Juarez”, unda miles di nan ta kedando na Tijuana, ps bay na e refugio di El Chaparral, na e frontera cu San Ysidro y Tijuana.
Sin embargo, un hora despues di e comienso di e caminata, mas di shen di nan a kibra un cordon policial y a dirigi nan mes pa e paso aki y a bay na varios punto fronteriso, unda cu nan a subi e muraya na frontera.
Durante varios hora, grupo di migrantenan a keda na varios punto di conexión entre Tijuana cu Merca, mientras cu White House a duna ordo pa cera e waf fronteriso di San Ysidro, entre San Diego y Tijuana (Mexico), un di esunnan mas druk na mundo.
Den un entrevista na television, e minister di gobernacion, Alfonso Navarette a indica cu esunnan cu a participa den e hechonan “violento” aki lo wordo deporta “di biaha”.
Entre tanto, e presion na frontera ta sigui aumenta. Mayoria di e Mexicanonan a rechasa e fenomeno migratorio, ya cu 73,1% di nan ta considera cu e presencia di ilegalnan den nan comunidad lo aumenta delincuencia of lo kita trabao for di e Mexicanonan.