Durante e lunanan di october pa december 2016, Oficina Central di Estadistica (CBS) a tene un estudio bao di migrantenan na Aruba.
E estudio aki a carga e nomber “Aruba Migration and Integration Survey (AMIS)”. E meta di e estudio tabata pa obtene informacion tocante, entre otro, e caracteristicanan y e moda di biba di migrantenan na Aruba. E estudio a dirigi su mes principalmente riba e grupo di migrante cu recientemente a yega Aruba, esta personanan cu a nace pafo di Aruba y a bin biba na Aruba den e ultimo dies añanan.
CBS a publica recientemente e prome articulo cu ta contene informacion cu a wordo colecta durante di e AMIS. E articulo aki ta obtenibel riba e website di CBS, www.cbs.aw. Akinan ta sigui un resumen cortico di e prome resultadonan.
Un total di 1,092 migrante recien di 14 aña of mas di edad, a wordo entrevista hunto cu e miembronan di nan hogar. Pa cada hogar un migrante principal a ser identifica, cual ta e prome persona den e hogar cu a establece su mes na Aruba. Den total, 832 migrante principal a ser entrevista.
E resultadonan di e AMIS ta indica cu mayoria persona ta immigra directamente for di nan pais di nacemento, cu mayoria biaha ta paisnan Latino Americano, manera Colombia, Republica Dominicana y Venezuela.