Un di cambionan lo no ta den e reglanan sino si den e instancia responsabel pa otorga e formulario di garantia, cu antes tabata “Directie Wetgeving en Juridische Zaken” y cu awor lo bira I.A.S.A., e departamento responsabel pa Inmigracion y Warda nos Costa, cu tin un oficina den e edificio di Codemsa na Cumana. Ey den oranan di mainta lo por atende e peticion pa para garantia pa un bishitante. Nos ley di admision pa un bishitante haya entrada na Aruba como turista ta indica cu mester por demostra di tin suficiente medio financiero pa cubri e estadia ($150 pa dia). Ta haci excepcion si e bishitante tin un persona cu ta para garantia pa su gastonan di estadia.
E rekisitonan pa por para garantia pa un bishitante ta cu e peticionario mester tin status legal di estadia na Aruba (residente of residente cu permiso), e por para garantia solamente pa famia, mester tin un entrada minimo di Afl. 2.060,= bruto pa luna y un garante por firma te cu maximo 3 persona depende di entrada. Adicional mester presenta un seguro di biahe pa e bishitante (obtenibel na companianan di Seguro). Ta bon pa enfatisa cu e ambtenaar por pidi pa un carta di bon conducta (obtenibel na Ministerio Publico y/of un prueba cu no tin beslag riba entrada obtenibel na Corte) si e ta duda den cierto informacion.
Por aplica pa e formulario di garantia na oficina di IASA situa den edificio unda antes tabata Codemsa den Caya G.F. Betico Croes (Cumana). Orario di aplicacion pa carta di garantia ta di 8:30am – 11:30am di dialuna pa diabierna. E peticionario mester identifica su mes cu un paspoort of cedula (no ta acepta rijbewijs) y entrega un copia. Mester firma e formulario di garantia den presencia di e ambtenaar y paga Afl. 10,= pa e formulario di garantia.
Na momento di haya e carta di garantia, mester post e formulario na tempo pa e bishitante, prome cu e biaha pa Aruba, pa e por mustra Inmigracion na entrada.
Ta masha importante subraya cu no ta permiti pa un persona para garantia pa bishitante(nan) cu e no conoce. No ta permiti pa e bishitante(nan) keda na un otro adres cu no ta esun di e persona cu ta para garante. Otorgando un formulario di garantia no kiermen cu automaticamente e bishitante(nan) tin entrada pa Aruba. Si den entrevista na yegada e suministra informacion cu no ta cuadra (por ehempel duna un otro adres di locual a menciona riba e formulario di garantia), lo prohibi e entrada. Ta adverti cu mal uzo of gañamento riba e formulario di garantia por conduci cu e garante ta subi “Blacklist” y lo no por para garantia mas pa un periodo di 5 aña.
E maneho desde awe no ta nobo, sino ta interpreta e reglanan manera debe ser. Te cu recien tabatin hopi mal uzo di e reglanan, tin hende ta haci negoshi cu e paramento di garantia aki, ta cobra e turistanan, ta pone nan traha a cambio di e “fabor” y asina por sigui menciona. Tambe ta nota cu e garante no kier para responsabel na momento cu e bishitante pasa su dianan cu el a haya pa keda Aruba y tampoco kier para responsabel si e mester bay dokter of Hospital. Tur esaki e peticionario mester tene cuenta cune pa evita gastonan innecesario.
A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion. Trabounan sinembargo ta den fase final pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa. Te awor Servicio di Inmigracion ta consisti di mas o menos 60 empleado mientras cu Warda nos Costa ta conta cu 16 empleado.