Riba e islanan di Caribe Hulandes, forsa di orden y e sistema financiero ta bao presion debi n’e scarsedad di personal y recurso, e procuradornan general saliente di Ministerio Publico di Aruba y di Corsou, Ton Maan y Bote ter Steege, a bisa.
Ta pone special atencion riba e prizonnan yen y n’e vulnerabilidad di e sistema financiero riba ambos isla.
“E investigacionnan financiero ta den su inicio na Corsou y Aruba, loke ta trece riesgo serio p’e sistema financiero di e pais,” Ter Steege a bisa. El a señala e consecuencianan di un posibel fracaso di e sistema bancario riba e islanan, provoca p’e dependencia di e banconan Mericano. “Si e Mericanonan kita nan sosten, tur sistema di pago bancario di e region lo collapse,” el a añadi.
Maan, Procurador General saliente di Corsou, a enfatisa riba e esfuersonan di e banconan pa cumpli cu e regulacionnan contra labamento di placa y financiamento di terorismo. “E incumplimento di e normanan aki por tin consecuencia desastroso, ya cu e islanan ta depende riba gran parti di e banconan coresponsal Mericano,” Maan a splica.
PRIZON
Otro problema grave ta e sobrepoblacion den e prizonnan. “Simplemente no tin luga pa cera tur preso,” Maan a bisa. Esaki ta tuma luga n’e situacionnan cu e personanan cu falta entre seis luna y un aña di sentencia pa cumpli, hopi biaha ta wordo libera pa laga luga pa esunnan cu comete delito mas grave.
Ter Steege ta expresa su preocupacion p’e penanan di prizon no ehecuta durante e ultimo binti añanan. “Tabata trata di condena pa violencia domestico, delito sexual menor, ladronicia, robo y delito financiero. Door di pone menos persona den prizon preventivo, nos ta purba di habri cel y aresta hende na aeropuerto cu un sentencia ehecutabel.”