Partido MEP ta lamenta cu planta nacional Tele Aruba ta laga un criminal bin den aire papia malo di hendenan di MEP siendo cu MEP ta wak e siguridad di nos pueblo di un persona cu a haci hopi daño na nos pais segun Sra. Evelyn Wever Croes.
Segun Sra. Wever- Croes, e mas insolito ta cu Tele Aruba ta coopera cu un acto asina. E ta sigui bisa cu ningun hende no por intimida ni menasa su persona of su coleganan ora cu nan ta haci nan trabao. Loke nan ta haci ta cuestiona maneho di Minister di Husticia, ariba e tema di verlof y MEP a trece padilanti, e motibo cu ta cuestiona esaki. Esaki a trece hopi conmocion den comunidad.
Trabao di Parlamento y oposicion ta di controla y cuestiona gobierno y e Minister di Husticia den e caso specifico aki. Ningun hende por hinca den nan cabes cu e ta purba di stroba of intimida, of menasa miembronan di partido MEP.
Mas aleu, Sra. Wever- Croes no por keda sin menciona e hecho cu nos planta nacional a coopera cu e hecho aki, mientras oposicion ta haya apenas dos pa tres minuut, un preso ta haya 6 minuut. Tambe Sra. Wever – Croes a bisa cu Tele Aruba a manipula informacion, bisando cu e entrevista a wordo haci na KIA, mientras cu esaki no ta berdad.
Un biaha mas, lider di MEP ta reitera cu su trabao ta di controla y cuestiona gobierno. El a dirigi su mes na Minister di Husticia di e pais, mr Athur Dowers, cu ta un persona cu Sra. Wever- Croes a perde respet p’e, ya cu e no ta interesa pa tene e pais sigur. Como ser humano, el a demostra di ta un persona di masha poco curashi. Pasobra enbes di bin den debate publico, den Parlamento, embes di reacciona ariba parlamentario, e ta dicidi di saca un preso pa purba di ataca y menasa miembronan di partido MEP. Sra. Evelyn- Wever Croes, a sigui bisa cu e minsiter no mester recuri na actonan asina cobarde, asina poco curashi pa loke ta mandatario di e pais.
Un cos ta sigur di loke a wordo trece dilanti, na Aruba criminalnan ta fiesta. E gobierno no ta atende criminalidad cu man duro. Lamentablemente mester a recurri na autoridadnan pa e caso, pero autoridadnan no a mustra interes den e tema aki. Akinan pro mira unda ta para, y aki ta mira tambe ta pakico Aruba ta den gara di criminalnan. Pakico criminalnan ta fiesta na Aruba, pakico nos ta bayendo den abismo y no tin futuro pa nos yiunan.
Fraccion di MEP lo sigui cu nan trabao, y nan lo sigui insisti pa reunionnan wordo yama den Parlamento. Y lo sigui pone presion riba presidente di parlamento, Sra. Mervin Wyatt- Ras, cu ta narco complaciente of crimen complaciente. MEP lo sigui pone presion ariba instancianan na Aruba, paso nan kier pa nan combati criminalidad cu man duro.
Ora MEP bin bek na mando, nan lo bin cu man duro pa combati criminalidad, helicopter lo bin bek, Warda Nos Costa lo haya su autoridad bek. Esunnan cu realmente ta interesa pa ataca criminalidad, ta bon bini pa sigui cu MEP y esunnan cu kier sigui tapa e criminalnan y cu tin miedo di actua, no tin luga pa nan. MEP ta preparando pa unabes nan drenta gobierno, nan si por haci e diferencia.
Pero di otro banda e preso ta bisa cu e la sali a base su derecho di a comporta su mes bon pa cual a puntra Sra. Wever Croes kisas mester cambia e ley di e preso. E derecho di presonan ta algo cu mester wordo revisa. E unico persona cu a cuestiona su derecho tabata Sr. Melvin Tromp, cu a sali ataca partido MEP.
Comunidad ta sinti cu e gobierno aki ta dunando e señal robes ayafo, e ta dunando e señal cu criminal ta unda cu nos ta. Y ta p’esey MEP kier discuti y debati cu Minister di Husticia den parlamento. Pero e ta manda preso ataca partido MEP y riba e tema specifico lo hiba e debate den parlamento y lo wak si mester bin cambio den maneho.
Aworaki segun Sra. Wever – Croes, aworaki si nan garabo cu celular den KIA, e preso ta perde su derecho di verlof. Tin cosnan cu mester inventarisa mas miho. Esey ta e nivel mas micro, cu lo mester bay wak.
Pa finalisa, Sra. Evelyn Wever- Croes a bisa cu pa aworaki, loke mester para na dje ta, cu ki autoridad Minister ta saca preso pa ataca contricantenan politico.