Manera ya ta conoci, e siman aki nos isla lo ta anfitrion di un grupo masha importante di ehecutivonan di e sector di turismo crucero. Un total di 83 miembro platinum di FCCA, 11 empleado di FCCA y 47 invitado ta na Aruba actualmente pa e conferencia. E Platinum Associate Member Advisory Council Conference (PAMAC) di Florida-Caribbean Cruise Association (FCCA) ta un evento cu Aruba Tourism Authority ta wak como un oportunidad excelente pa ilustra e avansenan cu Aruba a conoce. Hunto cu socionan local, A.T.A. a prepara un programa caminda lo brinda e participantenan di e conferencia e experiencia cu Aruba por ofrece como destino turistico na pasaheronan crucero.
Adicional na sesionnan di trabou cu stakeholders local y presentacionnan di parti di A.T.A. y A.P.A., e participantenan di e conferencia ta wordo ofreci pa conoce nos isla y su encantonan na diferente manera. Tambe Aruba mas cu claro ta tuma e oportunidad pa reuni cu e ‘Security and Operations Committee’ di FCCA, cual ta consisti di ‘decision makers’ clave pa cu turismo crucero. E sesion cu e comision a tuma luga diaranson mainta. Fuera di presentacionnan oficial parti mainta, a brinda un tour di e facilidad di puerto, di Caya G.F. Betico Croes y vecindario, na unda a haci uzo di e tram tambe. Durante nan walking tour, e delegacion a ricibi un caluroso bon bini di Prome Minister Mike Eman, Minister Ing. Mike de Meza encarga cu maneho di Turismo, Transporte, Energia y Medio Ambiente y Minister di Economia y Comunicacion Richard Arends.
Participantenan general, miembro Platinum di FCCA, ta wordo ofreci diferente sailing trip, oportunidad pa conoce nos gastronomia, participa den un tour den Parke Arikok, San Nicolas y Mangel Halto na unda nan por disfruta di nos beachnan bunita.
Durante e reunion cu e ‘Security and Operations Committee’ a presenta diferente informacion. Aruba ta un destinacion masha gusta pa turismo crucero y un di e islanan miho bishita. Compara cu e prome 5 luna di 2016, turismo crucero pa 2017 a aumenta cu 12. 8%. Esey ta un total di 45.015 bishitante mas cu e mesun temporada di aña pasa. Durante un estudio haci na 2016 door di A.T.A. diferente aspecto ta destaca; ora a puntra e turistanan crucero con nan ta haya e cordialidad di nos localnan, 94% a responde cu nan ta satisfecho/hopi satisfecho cu esey. Ademas, 66% di e turistanan crucero a indica cu nan a scoge nan linea di crucero pasobra Aruba tabata riba e itinerario. Nos cordialidad, siguridad y nos beachnan ta keda e tres factornan mas importante pa e bishitante.
Tambe por mira claramente e importancia pa un destinacion di sigui desaroya su mes, pa sigui atrae e industria di turismo, stay-over y crucero. Por ehempel e embeyesimento di Oranjestad y Paardenbaai Plaza, e boothnan cu ta percura pa e turistanan por haya/pidi informacion di nos isla, e manera cu e borchinan ta indica unda e turista por bay (signage), renobacion di nos faro na Arashi, y naturalmente embeyesimento di nos playanan, tur a wordo subraya como desaroyonan importante pa asina continuamente sigui enrikese e experiencia di e bishitante. Tur esaki ta haci nos destinacion uno mas atractivo, como tambe e turismo lo por laga mas atras den nos economia.
Durante di e reunion cu e ‘Security and Operations Committee’ a ilustra tambe cu e estudio di BREA (Business Economice Research Advisors) conduci na 2015 ta mustra cu e turista crucero ta gasta un promedio di US$ 112.10 pa persona durante nan bishita na Aruba. Esaki ta 17.5% di crecemento compara cu e estudio previo di aña 2012.
Pa cu e evento actual: PAMAC ta un evento cu FCCA ta coordina pa su miembronan platinum y pa liñanan crucero keda na ‘forefront’ di informacion riba tanto e industria y su miembronan, como tambe destinacionnan, mientras cu ta haya maneranan pa maximalisa e beneficionan pa tur. FCCA ta un organisacion comercial no lucrativo cu ta consisti di 19 miembro di liñanan crucero operando riba mas cu 100 barco den e awanan di laman di Florida, Caribe y Latino America.